15 iyul 2011 02:15
Vaqif Cavadov üçün dolu səddi (YENİLƏNİB)
Azərbaycan millisinin hücumçusu Vaqif Cavadov Rusiyanın “Volqa” klubunun heyətində növbəti oyununu keçirib. Azerisport.az xəbər verir ki, onun komandası Avstriyadakı təlim-məşq toplanışı çərçivəsində üçüncü sınaq matçına çıxıb.
Nijni Novqorod klubunun bu dəfəki rəqibi İsrail “Hapoel”i idi. Təl-Əvivi təmsil edən bu komanda ilə qarşılaşmada baş məşqçi Dmitri Çerışev Vaqifə ilk dəqiqələrdən şans verib. Lakin təəssüf ki, start heyətində meydana çıxması həmyerlimizə düşməyib. Belə ki, qarşılaşma güclü dolu səbəbindən yarımçıq qalıb. Görüşün 22-ci dəqiqəsində hakimlərlə baş məşqçilərin qarşılıqlı razılığına əsasən matçın ləğvinə qərar verilib. Həmin dəqiqəyə qədər isə qarşılaşmada hesab açılmayıb.
Xatırladaq ki, Cavadov bundan öncə keçirilən Danimarkanın “Copenhagen” klubuyla görüşdə (0:1) 75-ci, İngiltərənin “Sheffield Wednesday” komandası ilə qarşılaşmada isə 70-ci dəqiqədə meydana daxil olmuşdu.
