15 iyul 2011 11:50
Daha bir əfsanə futboldan getdi
Futbol üzrə Fransa yığmasında dünya və Avropa çempionu Patrik Vieyra karyerasını başa vurub. Azerisport.az xəbər verir ki, 35 yaşlı yarımmüdafiəçi son 1,5 ildə İngiltərənin “Manchester City” klubunda çıxış edirdi.
İyulun 14-də rəhbərlik onun klubda qalaraq futbolun inkişafına cavab verəcəyini və kommersiya layihələrində iştirak edəcəyini açıqlayıb. Vieyra klubda işləmək və futbolu başqa tərəfdən öyrənmək imkanı yaratdığı üçün bu kluba, eləcə də oynadığı müddətdə ona hər zaman dəstək olan azarkeşlərə minnətdarlıq edib.
Qeyd edək ki, Patrikin ilk 2 klubu Fransa “Kann”ı ilə İtaliya “Milan”ı olub. Lakin o, karyerasının böyük hissəsini (1996 – 2005) İngiltərə “Arsenal”ında keçirib. Bu komanda ilə 3 dəfə İngiltərə çempionu, 4 dəfə ölkə kubokunun sahibi olub. Sonradan Vieyra İtaliyanın “Juventus” və “İnter” komandalarında da çıxış edərək, 4 qat İtaliya çempionu tituluna yiyələnib. Təcrübəli yarımmüdafiəçi 2010-cu ilin yanvarında “Manchester City”yə keçib, bu komanda ilə 2010-2011-ci il mövsümündə son titulunu – İngiltərə Kubokunu əldə edib.
Patrik Vieyra Fransa millisinin heyətində 107 oyuna 6 qol vurub, 1998-ci ildə dünya, 2000-ci ildə Avropa çempionu olub.
