15 iyul 2011 11:41
Sadıq Sadıqov: Neftçi Dinamonu keçəcək gücdədi
Azərbaycan çempionu “Neftçi”nin prezidenti Sadıq Sadıqov azerisport.az saytına müsahibəsində UEFA Çempionlar Liqasının ikinci təsnifat mərhələsinin “Dinamo” (Zaqreb) ilə ilk oyununu dəyərləndirib.
Bəri başdan qeyd edək ki, Sadıqov komandasının oyunundan öncə sağlıq durumunda müəyyən problemlərlə üzləşdiyindən hətta Almaniyadakı klinikalardan birində müalicə almaq məcburiyyətində qalmışdı. Zaqrebə böyük ümidlərlə gəlsə də, oyundan (0:3) sonra çox məyus görünürdü.
“Belə nəticəni gözləmirdim. Rəqibin qapısı elə bil tilsimlənmişdi. Biz az qol vəziyyəti yaratmadıq. Heyf ki, bunlardan yararlanan olmadı. Emil Mpenza, Ruslan Abışov, Flavinyo əllərinə düşən şansları dəyərləndirməyə borclu idilər. Düzdü, Abışovun epizodunda zaqreblilərin qapıçısı yaxşı oynadı. Amma Mpenza və Flavinyo elə şansları qaçırdıqlarına görə ancaq özlərini qınaya bilərlər”.
Sadıqov bəzi futbolçuların çıxışından narazı qaldığını gizlətmir: “Onların bəzisinin çıxışı məni qane etmədi. Futbolçularımmızdan daha çox şey gözləyirdim. Amma bacardığını meydanda göstərən oyunçular da var idi. Həm də deyərdim ki, belələri daha çox idi”.
Sadıqov fransalı hakim Antoni Qotyenin də işini xüsusi qiymətləndirib. Klub prezidentinin sözlərinə görə o, ümumiyyətlə belə oyunu idarə etməyə hazır deyildi: Mən başa düşə bilmirəm, onu necə belə vacib avrokubok oyunlarına təyin edirlər. Onun qapımızı təyin etdiyi penalti ədalətsiz idi. Matçdan sonra qapıçımız Saşa Stamenkoviç mənə yaxınlaşdı və bildirdi ki, rəqib qapıçıya toxunmamışdım. Hətta “Dinamo” rəhbərliyi də hakimin qərarlarından narazı idilər”.
Lakin “Neftçi”nin prezidenti ilk oyundakı darmadağına rəğmən ayın 19-da keçiriləcək cavab oyunu üçün optimistliyini itirmir: “Fikrimcə, baş məşqçi ilk oyunu yaxşı analiz edəcək və özü üçün müəyyən nəticələr çıxaracaq. Məncə, “Dinamo”nu keçəcək gücdəyik”.
