16 iyul 2011 16:11
Arif Əsədov: Baş məşqçi postundan getməyə hazıram
Azərbaycan çempionu "Neftçi"nin baş məşqisi Arif Əsədov bu gün jurnalistlər üçün mətbuat konfransı keçirib. Azerisport.az xəbər verir ki, o, UEFA Çempionlar Liqasının ikinci təsnifat mərhələsinin “Dinamo” (Zaqreb, Xorvatiya) ilə cavab oyunu öncəsi bir sıra maraqlı fikirlər səsləndrib:
"Azarkeşlərimizdən bir daha üzr istəyirəm. Hesab oyuna görə olmadı. Fərdi səhvlərə görə qapımızdan 3 cavabsız qol buraxdıq" – deyə Əsədov sözə başlayıb.
Baş məşqçi Bakıdakı oyunda qələbə qazanacaqlarına ümid etdiyini bildirib: "Zaqrebdə komanda oyununda pis təsir bağışlamadıq. 4 yüz faizli qol epizodu yarartdıq. Ancaq təəssüf ki, yararlana bilmədik. Səfər oyunu üçün bu, çox yaxşı göstəriciydi. Lakin məğlubiyyət qaçılmaz oldu. Buna baxmayaraq, ümid edirəm ki, Bakıda qələbə qazanacağıq. Çünki itirəcəyimiz bir şey yoxdu”.
“Dünən komandanın yığıncağı oldu. Bilirik ki, braziliyalı futbolçular avrokuboklar üçün alınıb. "Turan", "Simurq"a qarşı bir ay məşq etsəm, mən də oynayaram. Futbolçularla söhbətimiz oldu. İnanıram ki, onlar Bakıda tam fərqli çıxış edəcəklər” – deyə, Əsədov Flavinyo ilə Rodriqinyonun zəif çıxışına münasibət bildirib.
“Ağ-qaralar”ın çalışdırıcısı cavab matçına daha ciddi hazırlaşacaqlarını deyib: “Artıq rəqibin bir neçə oyununu izləmişik. Onların əsasən cinah müdafiəçilərinin hücuma qoşulması bizim üçün təhlükə yaratdı. Rəqibin mərkəz oyunçuları təhlükəli olduğundan bütün diqqətimizi mərkəzə yönəltdik ki, cinahlar boş qaldı və nəticədə məğlub olduq. Rəqibə əsasən sürət və tez qərar verməkdə uduzduq. Lakin Bakıdakı oyunda bu səhvlərimizdən nəticə çıxararaq qələbə qazanmağa çalışacağıq".
Əsədov yeni oyunçu almaması ilə bağlı da danışıb: "İstədiymiz futbolçuların transferi onların klubları ilə olan problemləri üzündən baş tutmadı. Bizim günahımız deyildi. "Neftçi"nin transferləri bəzi klublarımızın transferlərini heç də üstələmir. Onlarla müqayisədə "Neftçi"nin transferlərinin qiyməti orta səviyyədədi".
Arif bəy məsuliyyəti öz üzərinə götürməyə hazır olduğunu bildirib: "Məsuliyyəti öz üzərimə götürməyə hazıram. Mən Neftçi"yə pul yox, ad qazanmaq üçün gəlmişəm. Əgər kimsə, gəlib "Neftçi"ni yuxarılara daşıya biləcəksə, mən getməyə hazıram".
