17 iyul 2011 13:53
Krunoslav Yurçiç: Neftçi ilə cavab matçında bəzi dəyişikliklər edəcəm
UEFA Çempionlar Liqasının ikinci təsnifat mərhələsində Azərbaycan çempionu “Neftçi”nin rəqibi olan Xorvatiyanın “Dinamo” klubunun baş məşqçisi Krunoslav Yurçiç Bakıya səfər öncəsi mətbuat konfransı keçirib. Azerisport.az xəbər verir ki, Zaqreb təmsilçisinin çalışdırıcısı ilk oyunda 3:0 hesabıyla məğlub etdikləri “ağ-qaralar”la cavab görüşü öncəsi bunları söyləyib:
“Biz cavab oyununa çox ciddi hazırlaşırıq. İlk oyunla müqayisədə mən bəzi dəyişikliklər etməli olacam. Amma oyundan öncə bu planlarım haqda mətbuata danışmaq istəmirəm. Əsas odu ki, biz çıxıb oynamalıyıq” – deyə, Yurçiç sözə başlayıb.
“Biz cavab oyununa çox ciddi hazırlaşırıq. İlk oyunla müqayisədə mən bəzi dəyişikliklər etməli olacam. Amma oyundan öncə bu planlarım haqda mətbuata danışmaq istəmirəm. Əsas odu ki, biz çıxıb oynamalıyıq” – deyə, Yurçiç sözə başlayıb.
Xorvatların çalışdırıcısı “Neftçi”nin də Bakıda hansı taktikayla oynayacağına dair mülahizələrini söyləyib: “Onların iki hücumçuyla oynayacaqları daha inandırıcı görünür. Hansı ki, Zaqrebdəki oyunun da ilk 20 dəqiqəsində məhz belə çıxış etdilər. Sadəcə, bu onlar üçün bir qədər yenidi. Çünki oyun üslublarına uyğun gəlmir”.
Heyətdəki dəyişikliklərə gəlincə, Yurçiç bildirib ki, ilk oyunda olduğu kimi, argentinalı müdafiəçi Leandro Kufre yenə “Neftçi”yə qarşı forma geyə bilməyəcək: “Onun Bakıya aparılmayacağı artıq bəllidi. Biz onu meydana buraxmaqla yenidən eyni səhvi təkrarlamaq istəmirik. Yerko Lekoya gəlincə, o, artıq fərdi proqramla məşq edir. Yenicə komandaya qoşulub. Oynayıb-oynamayacağına bundan sonra qərar veriləcək”.
Yurçiç həmçinin “Dinamo” – “Neftçi” cütünün qalibinin üçüncü təsnifat mərhələsindəki rəqiblərinə də toxunub: “Hələlik hadisələri qabaqlamaq istəmirəm. Potensial rəqiblərimiz haqda yalnız üçüncü təsnifat mərhələsinə vəsiqə qazandığımız halda danışmaq olar. Gəlin öncə “Neftçi” ilə cavab oyununa diqqətimizi yönəldək”.
Qeyd edək ki, “Dinamo” - “Neftçi” cütünün qalibini növbəti mərhələdə “Bangor City” (Uels) – HJK (Finlandiya) cütünün qalibi ilə oyun gözləyir. Bu cütün ilk oyununda finlər 3:0 hesabıyla qələbə qazanıblar.
