17 iyul 2011 11:54
Uruqvay Argentinanı yarımfinala həsrət qoydu
Argentinada təşkil olunan Amerika Kuboku davam edir. Azerisport.az xəbər verir ki, dünən yarımfinal mərhələsinin ilk oyunları keçirilib.
Belə ki, bu mərhələdə üz-üzə gələn Kolumbiya və Peru, eləcə də Argentina və Uruqvay arasında kifayət qədər maraqlı qarşılaşma baş tutub. Kolumbiya – Peru matçında hələ görüşün 66-cı dəqiqəsində kolumbiyalılar hesabı açmaq üçün real imkan qazanıblar. Lakin “Porto”dan tanıdığımız Falkao penalti zərbəsini dəqiq yerinə yetirə bilməyib. 90 dəqiqənin tamamında tərəflər hesabı aça bilmədiyindən əlavə vaxta ehtiyac duyulub. Məhz bu vaxt ərzində iki qol vuran Peru millisi növbəti mərhələyə vəsiqə qazanıb.
Turnirin əsas favoritlərindən olan Argentina və Uruqvay arasındakı qarşılaşma isə daha prinsipial və gərgin alınıb. Qeyd edək ki, bu komandalar hər ikisi pley-offa çətinliklə adlamışdılar. Elə bu görüşdə də komandalardan hansınısa favorit göstərmək çətin idi. Baxmayaraq ki, meydan sahibi qismində çıxış etməsi argentinalılara əlavə üstünlük qazandırırdı. Lakin görüş başlayan kimi argentinalılar qapısında qol görüblər. Düzdü, İquayn tezliklə hesabı bərabərləşdirib. Matçın əsas vaxtında başqa qol vurulmadığından əlavə vaxt təyin olunsa da, tərəflər burda da qələbə qolunu vura bilməyiblər. Belədə, qalib penaltilərlə müəyyənləşib ki, daha dəqiq oynayan Uruqvay 5:4 hesablı qələbə sayəsində növbəti mərhələyə adlayıb.
Yeri gəlmişkən qeyd edək ki, bu görüş kifayət qədər sərt və gərgin alınıb. Belə ki, hər komandadan bir futbolçunun meydandan qovulduğu görüşdə 11 dəfə də sarı vərəqəyə əl atıb.
1/4 final mərhələsinin digər oyunları bu gecə keçiriləcək. Braziliya yarımfinala vəsiqə uğrunda Paraqvayla, Çili isə Venesuela ilə mübarizə aparacaq.
Amerika Kuboku
1/4 final
16 iyul
Kolumbiya – Peru – 0:2
Qollar: Lobaton, 102, Varqas, 112.
Argentina – Uruqvay – 1:1 (penaltilərlə 4:5)
Qollar: İquayn, 18 – Peres, 6.
