18 iyul 2011 12:15
Braziliyaya da Argentinanın aqibətini yaşatdılar
Argentinada təşkil olunan Amerika Kuboku davam edir. Azerisport.az xəbər verir ki, dünən yarımfinal mərhələsinin son oyunları keçirilib.
Braziliya millisi bu mərhələdə Paraqvayla qarşılaşıb. Qarşılaşmanın əsas vaxtı qolsuz bitdiyindən daha 30 dəqiqə oynanılsa da, bu müddət ərzində də tərəflər qapılara yol tapa bilməyiblər. Beləcə, qalib penaltilərlə müəyyənləşib. Daha dəqiq oynayan paraqvaylılar braziyalıların penaltidən də qol vurmasına imkan verməyiblər və 2:0 hesabıyla qalib gələrək daha bir sensasiyaya imza atıblar. Beləcə, meydan sahibi Argentinanın ardınca daha bir favorit turnirlə erkən vidalaşıb. Qeyd edək ki, 6 sarı vərəqənin göstərildiyi bu oyunun 103-cü dəqiqəsində hər komandadan bir futbolçu meydandan qovulub.
Günün digər matçı da kifayət qədər gərgin keçib. 7 sarı, 2 qırmızı vərəqənin göstərildiyi Çili – Venesuela görüşündə 83-cü dəqiqədə birincilər, 90-cı dəqiqədə isə sonuncular azlıqda qalmalı olublar. Hesabı ilk yarıda Venesuela açıb. Çili sonradan hesabda tarazlıq yaratsa da, venesuelalılar tezliklə yenidən önə keçiblər. Sona qədər hesabı qoruyan bu komanda yarımfinala son vəsiqənin sahibi olub.
Qeyd edək ki, bir gün öncə Peru və Uruqvay da müvafiq olaraq Kolumbiya ilə Argentinanı məğlub edərək, yarımfinala vəsiqə qazanmışdı.
Beləliklə, iyulun 19-da keçiriləcək ilk yarımfinal görüşündə Peru Uruqvayla qarşılaşacaq. Bir gün sonra isə Paraqvay Venesuela ilə münasibətlərinə aydınlıq gətirəcək.
Amerika Kuboku
1/4 final
17 iyul
Braziliya – Paraqvay – 0:0 (penaltilərlə - 0:2)
Çili – Venesuela – 1:2
Qollar: Suazo, 70 – Vizkarrondo, 35, Çiçero, 80.
