19 iyul 2011 16:51
Öncə Rednik, sonra İvanir
UEFA Avropa Liqasının ikinci təsnifat mərhələsinin “Xəzər Lənkəran” və İsrailin “Maccabi” klublarının cavab oyunu öncəsi bu komandaların son məşqlərinin və mətbuat konfranslarının vaxtları müəyyənləşib. Azerisport.az xəbər verir ki, sözügedən tədbirlərin hamısı Lənkəranda baş tutacaq.
Belə ki, sabah saat 17:30-da Azərbaycan kubokunun qalibinin çalışdırıcısı Mirça Rednik jurnalistlər önünə çıxacaq. Bundan bir saat sonra isə rumıniyalı mütəxəssis yetirmələrini açıq məşqə çıxaracaq.
Təl-Əviv təmsilçisinin baş məşqçisi Motti İvanirin mətbuat konfransı isə saat 19:30-da başlayacaq. Bundan bir saat sonra israillilər Lənkəran şəhər stadionunda son məşqə çıxacaqlar.
Qeyd edək ki, “Xəzər Lənkəran” – “Maccabi” matçı iyulun 21-də Lənkəranda keçiriləcək və saat 20:30-da start götürəcək. Bu komandalar arasındakı ilk oyun 1:3 hesabıyla İsrail təmsilçisinin xeyrinə bitmişdi.
