19 iyul 2011 11:34
Bursaspor İnteri belə yendi (FOTOREPORTAJ)
Xəbər verdiyimiz kimi, iyulun 18-də "İnter" Türkiyənin "Bursaspor" komandasıyla yoxlama matçı keçirib. Azerisport.az xəbər verir ki, oyunun əvvəli "İnter"in rəqib komandanın qapısı önündə təhlükəli vəziyyətlər yaratmasıyla yadda qalıb. Hətta Petar Zlatinov matçda erkən qolun müəllifi də ola bilərdi. Zlatinov sağ cinahdan "Bursaspor"un cərimə meydançasına sürətlə daxil olmağı bacarsa da, qapını dəqiq nişan ala bilmədi. Sonrakı dəqiqələrdə Samir Zərgərov "İnter"i önə çıxarmağa yaxın olub. Əvəzində rəqib komandanın oyunçuları əks-hücumların birində sol cinahdan sürətlə cərimə meydançasına soxularaq, Georgi Lomayanın qapısına yol tapmağa müvəffəq olublar. Bundan sonra komandamız çox çalışsa da, birinci hissədə hesab dəyişməyib.
İkinci hissədə Kaxaber Tsxadadze meydana yeni heyəti buraxıb. Erkən dəqiqələrdə Elnur Abdulov hesabda tarazlığı yarada bilərdi. Lakin onun təhlükəli hücumu nəticəsiz başa çatıb. Bundan sonra "Bursaspor" daha 2 qol vurmağı bacarıb. Matçın sonlarına yaxın Baçana Tsxadadze sağ cinahdan sürətlə ötürülən topu qapıdan keçirsə də, hakim bu dəfə də mərkəzi göstərməyib. Beləliklə, qarşılaşma 3:0 hesabıyla "Bursaspor"un xeyrinə başa çatıb.
