20 iyul 2011 18:16
Kəpəz də Premyer Liqadan imtina edir
Daha bir klub Azərbaycan Premyer Liqasında iştirakdan imtina edir. Azerisport.az xəbər verir ki, söhbət “Kəpəz”dən gedir.
Belə ki, komandanın növbəti mövsümə hazırlaşmasına, yoxlama görüşləri keçirməsinə baxmayaraq, Gəncə klubunun elitada çıxışı sual altındadı. Məsələ burasındadı ki, klubun sponsoru ondan imtina edib və belədə “Kəpəz”in Premyer Liqada çıxışı qaranlıq qalır. Böyük ehtimalla kluba yeni sponsor tapılmasa, “Kəpəz” də elitada çıxış etməyəcək.
Qeyd edək ki, bu, növbəti mövsüm ərəfəsində artıq üçüncü belə imtina olacaq. İlk olaraq ötən mövsümü birinci divizionun çempionu kimi bitirmiş “Abşeron” elitaya vəsiqə qazansa da, son anda Premyer Liqada çıxışdan imtina etdi və dağıldı. Əvəzində bu komandanın vəsiqəsi “Sumqayıt Şəhər”ə qismət oldu.
Bir neçə gün öncə isə “Muğan” növbəti mövsümdə Premyer Liqada çıxış etmək istəmədiyini rəsmi olaraq Peşəkar Futbol Liqasına bildirdi. Belədə PFL rəhbərliyi yenə birinci divizion klublarına müraciət ünvanladı ki, buna da ötən mövsümün nəticələrinə görə elitanı təkr etmiş, qaydalara əsasən bu mövsüm birinci divizionda oynamalı olan “Simurq” müsbət cavab verdi.
Lakin “Kəpəz”in imtinasından sonra onu əvəzləyəcək klub da yoxdu. Çünki birinci divizionun yerdə qalan klublarının maliyyə imkanları elitada çıxış etmək üçün yetərli deyil. Bu üzdən də yeni mövsümdə 11 klubdan ibarət çempionatın keçirilməsi istisna olunmur.
Sonda onu da qeyd edək ki, 2011/12 mövsümünün püşkü iyulun 22-də atılacaq.
