22 iyul 2011 17:51
Növbəti mövsümün startında Neftçi - Qarabağ derbisi (YENİLƏNİB)
Bu gün futbol üzrə Azərbaycan Premyer Liqasının 2011/12 mövsümünün püşkü atılıb. Azerisport.az xəbər verir ki, sözügedən tədbir AFFA-nın inzibati binasında keçirilib.
Qeyd edək ki, sayca 20-ci olan 2011/12 mövsümündə də ötən illərdə olduğu kimi yarışa 12 komanda qoşulacaq və yenə "altılıq" sistemi tətbiq olunacaq. Yeni mövsümdə yeniliklərin tətbiq olunub-olunmayacağı məlum deyil.
Ötən il olduğu kimi yenə paytaxt Bakı çempionatda 5 komanda ilə təmsil olunacaq. Ötən mövsümdən qalan AZAL, "Bakı", "İnter", "Neftçi" ilə yanaşı, "Rəvan" da güclülər dəstəsində çıxış edəcək. Sonuncular MOİK-in boşalan yerini dolduracaq.
Bölgə təmsilçilərinin sayı isə yenə 7 olacaq. Ötən mövsüm də çempionatda iştirak etmiş "Qəbələ", "Simurq", "Kəpəz" (ötən mövsüm "Gəncə" adlanırdı), "Turan", "Qarabağ" və "Xəzər Lənkəran"la yanaşı, "Sumqayıt Şəhər" də elita yarışlarına qatılacaq. Sonuncular "Muğan"ın boşalmış yerini dolduracaqlar.
Yeni mövsümdə Premyer Liqada iki debütant çıxış edəcək. "Rəvan" bu hüququ birinci divizionda 2-ci yeri tutaraq qazanıb. "Sumqayıt Şəhər" isə "Abşeron"un dağılmasından sonra belə bir hüquqa yiyələnib.
"Simurq" 2010-2011 mövsümünün nəticələrinə əsasən (11-ci yer) Premyer Liqanı tərk etsə də, yenidən güclülər dəstəsində çıxış edəcək. Buna səbəb "Muğan"ın çempionatdan imtinasıdı.
2011/12 mövsümünün bütün iştirakçıları:
1. AZAL (Bakı)
2. Bakı (Bakı)
3. İnter (Bakı)
4. Kəpəz (Gəncə)
5. Neftçi (Bakı)
6. Qarabağ (Ağdam)
7. Qəbələ (Qəbələ)
8. Rəvan (Bakı)
9. Simurq (Zaqatala)
10. Sumqayıt Şəhər (Sumqayıt)
11. Turan (Tovuz)
12. Xəzər Lənkəran (Lənkəran)
Artıq çempionatın püşkü atılıb. Beləliklə, sayca 20-ci milli çempionatın açılış turunda aşağıdakı cütlər görüşəcək:
Premyer Liqa
1-ci tur
Neftçi - Qarabağ
Qəbələ - Bakı
Xəzər Lənkəran - Sumqayıt Şəhər
İnter - Turan
Kəpəz - Rəvan
Simurq - AZAL
