27 iyul 2011 13:12
Azərbaycan millisi FİFA reytinqində irəlilədi
FİFA dünya yığmalarının yeni reytinq siyahısını açıqlayıb. Azerisport.az xəbər verir ki, Azərbaycan millisi yeni siyahıda bir pillə irəliləyib.
Komandamızın hesabındakı xal ehtiyatında heç bir dəyişiklik olmasa da, hazırda 282 xalla 111-ci pillədə qərarlaşıb. Berti Foqtsun yetirmələri ötən ay 112-ci idi.
Azərbaycan millisinin AÇ-2012-nin seçmə mərhələsindəki rəqiblərinə gəlincə, Almaniya 3-cü pillədəki yerini qoruyub - 1305 xal. Türkiyə isə 1 pillə geriləyərək 24-cü sıraya düşüb - 820 xal. Belçika daha çox - 2 pillə geriləyib və 691 xalla 37-ci yerdə qərarlaşıb. Avstriya da geriləyib. Lakin cəmi 1 pillə geri düşən bu ölkə yığması 479 xalla 66-cıdı. Qazaxıstan isə yerində sayıb -231 xalla 126-cı.
Yığmamızın avqustun 10-da yoldaşlıq oyunu çərçivəsində Bakıda qarşılaşacağı Makedoniyan da reytinq siyahısında irəliləyib. Bu ölkənin yığması 2 pillə irəliləyərək 338 xalla 98-ci olub.
Bütövlükdə, reytinq siyahısına yenə İspaniya liderlik edir (1588 xal). İkinci pillədə Hollandiya (1542), üçüncü yerdə isə Almaniya millisi yer alır (1305). Braziliya 1 pillə irəliləyərək 1202 xalla dördüncü olub. Uruqvay isə 13 pilləlik irəliləyişə nail olub. Bu ölkənin yığması hazırda 1156 xalla 5-cidi. İngiltərə 2 pillə geriləyərək hazırda 1146 xalla 6-cı yerdə qərarlaşıb. Portuqaliya 7-ci pillədəki mövqeyini qoruyub - 1076 xal. İki pillə geriləyən İtaliya səkkizinci (1059 xal), 1 pillə geri düşən Xorvatiya doqquzuncu (1033), yerində sayan Argentina isə onuncudu (1013).
Ötən ayın ən yaxşı komandası Baham adaları olub. Bu ölkə 45 pillə irəliləyə bilib. Ən pis göstərici isə Haitiyə məxsusdu - 28 pillə geri.
Növbəti reytinq siyahısı avqustun 24-də açıqlanacaq.
