28 iyul 2011 02:17
Super Superkubok oyunu – 5:4!
Fransa Süperkubokunun qalibi müəyyənləşib. Azerisport.az xəbər verir ki, həlledici oyunda son ölkə çempionu “Lille” “Olympique” (Marsel) ilə üz-üzə gəlib.
Matça daha fəal başlayan “Lille” 9-cu dəqiqədə Balmontun qolu ilə hesabı açıb. İlk hissədə başqa qol vurulmayıb. Lakin ikinci hissədə əsl qol fırtınası yaşanıb. Öncə 57-ci dəqiqədə Eden Hazard komandasının ikinci qoluna imza atıb. Amma 71-ci dəqiqədə Marsel təmsilçisi Ayeunun qolu ilə hesab arasındakı fərqi azaldıb. Bundan cəmi 1 dəqiqə sonra Sou yenidən “Lille” azarkeşlərini ayağa qaldırıb – 3:1
Lakin “Olympique” təslim olmaq istəməyib. 85-ci dəqiqədə Morel, iki dəqiqə sonra isı Remi çempionu cəzalandıraraq hesabı bərabərləşdirib – 3:3. 90-cı dəqiqədə Marsel klubu Ayeunun penaltidən vurduğu qolla hətta hesabda önə də keçib. Həmin epizodda “Lille”dən Çedjou qırmızı vərəqə də görüb. Elə həmin dəqiqə başa çatmamış Basa çempionu məğlubiyyətdən xilas edib – 4:4. Amma son saniyələrdə onun komandası cərimə meydançasında daha bir qayda pozuntusuna yol verincə, Ayeu bu şansı da boşa verməyib və möhtəşəm qarşılaşmada “Olympique”ə əzmkar qələbə və Superkuboku qazandırıb.
