29 iyul 2011 00:33
Mirça Rednik Mənsimovla görüşsə də...
“Xəzər Lənkəran”ın baş məşqçisi Mirça Rednikin klub prezidenti Mais Mənsimovla görüşü nəhayət ki, baş tutub. Azerisport.az xəbər verir ki, tərəflərin bu görüşündə bütün problemlərin yoluna qoyulacağı gözlənilsə də, deyəsən, indi də rumıniyalı mütəxəssis yekun qərar verməkdə tərəddüd edir.
Hər halda cənub klubunun icraçı direktoru Höccət Hacıyevin dediklərindən belə başa düşmək olar: “Bir neçə dəqiqə bundan əvvəl Mirça Rednik klub prezidenti ilə görüşüb. Görüş zamanı baş məşqçinin bütün tələbləri klub prezidenti tərəfindən qəbul olunub. Daha sonra Rednik sabah səhərə qədər “Xəzər Lənkəran”da qalıb-qalmayacağını bidirəcəyini dilə gətirib. Klub prezidenti eyni zamanda bizə tapşırıq verib ki, komanda üçün hansı şərait lazımdırsa burada yaradaq. İndi Rednikin “Xəzər Lənkəran”da qalıb-qalmaması özündən asılıdı. Biz də bunu çox istəyirik. Onun kimi səviyəli və insanpərvər məşqçini tapmaq asan olmayacaq. Düzdü, bu görüş planlaşdırıldığı gündə baş tutmadı, bir neçə gün gecikdi. Amma istənilən halda klub prezidenti şəxsən Rednikin “Xəzər Lənkəran”da qalaraq çalışması üçün hər cür şəraitin qurulacağını bildirib”.
Lakin maraqlıdı ki, Rednik Rumıniya mətbuatına açıqlamasında bir sıra qəribə fikirlər səsləndirib. Hətta Azərbaycanın iki klubundan da təklif aldığını bildirən mütəxəssis “Steaua” varıantının da istisna olmadığını dilə gətirib. Görünür o, bununla XL rəhbərliyinə müəyyən işarə vurmağa çalışır. Hər halda o, rəhbərliyin onu gec qəbul etməsini özünə qarşı hörmətsizlik kimi dəyərləndirib və son olaylardan da incidiyi aydın məsələdi. İndi görək, onun bu gün verəcəyi son qərar necə olacaq? (12-ci oyunçu)
