31 iyul 2011 01:38
Millimizin üzvü Volqada fərqləndi
Azərbaycan U-19 yığmasının üzvü Şamil Qurbanov Rusiyanın “Volqa” klubunun əvəzedicilərinin heyətində növbəti oyununu keçirib. Azerisport.az xəbər verir ki, o, Moskva “Dinamo”su ilə səfər qarşılaşmasının iştirakçısı olub.
Baş məşqçi Maqomed Adiyev millimizin müdafiəçisinə ilk dəqiqələrdən şans verib. Qurbanov matçı əvəzedilmədən keçirib. Qarşılaşmaya gəlincə, 34-cü dəqiqədə paytaxt təsmilçisinin üzvü Yeremeyev penaltidən hesabı açsa da, Paştov 49-cu dəqiqədə “Volqa”nı məğlubiyyətdən xilas edib. Qurbanov isə 47-ci dəqiqədə sarı vərəqə alması ilə diqqət mərkəzinə düşüb. Görüş elə 1:1 hesabıyla da başa çatıb.
Görüşdən sonra baş məşqçi Adiyev yaxşı oyununa görə fərqləndirdiyi futbolçular arasında millimizin üzvünün də adını xüsusi vurğulayıb. Qeyd edək ki, “Volqa”nın əsas heyətində Azərbaycanın əsas millisinin hücumçusu Vaqif Cavadov da forma geyir.
