1 avqust 2011 14:11
Rəşad Sadıqov: AÇ-də Rusiyaya azarkeşlik edəcəm
Azərbaycan yığmasının kapitanı Rəşad Sadıqov azerisport.az saytına DÇ-2014-ün seçmə mərhələsindəki rəqiblərimizi dəyərləndirib:
Portuqaliya
Portuqaliya
Bu komanda son illərdə beynəlxalq arenada səs-küylü uğurlar qazana bilmir. Seçmə və qrup mərhələlərini çətinliklə keçirlər. Komandada anlaşma da yüksək səviyyədə deyil. Fikrimcə, biz onlara qarşı normal oyun qura bilərik. Bununla onu demək istəmirəm ki, onları məğlub edə bilərik. Çüki portuqalların səviyyəsi bizimkindən xeyli yüksəkdi. Amma hər halda birinci səbətdən Portuqaliyadan da güclü rəqiblə düşə bilərdik. Əgər portəgizlərin indiki heyətini Luiş Fiqu, Ruy Koşta kimi futbolçuların dövründəki komanda ilə müqayisə etsək, üstünlük əlbəttə, o vaxtkılardadı.
Rusiya
Bizim üçün ən böyük üstünlüklərdən biri odu ki, Rusiya yığması Qafqaz ölkələri ilə səfər oyunlarında çətinlik çəkir. Onlar Bakıda da, Tiflisdə də, İrəvanda da oxşar aqibətlə üzləşiblər. Bu, güman ki, komandaların hardasa oxşar futbol sərgiləməsindən irəli gəlir. İstənilən halda biz eyni məktəbin yetirmələriyik. Bu üzdən də ən azı ev oyununda müsbət nəticəyə ümid edə bilərik. Səfərdə də döyüşmək olar. İstənilən halda Portuqaliya da, Rusiya da AÇ-2012-də oynayacaqlar. Məhz qarşıdakı qitə çempionatındakı çıxışları bu komandaların əhval-ruhiyyəsinə birbaşa təsir edəcək. Bizə təbii ki, hər iki komandanın uğursuz çıxışı çox sərf edəcək. Baxmayaraq ki, AÇ-2012-də Rusiyaya azarkeşlik edəcəm. Axı bizdə adətən belə olur: yarı Rusiyaya baxır, yarı Türkiyəyə.
İsrail
Bu, bizim üçün düşən ən qeyri-münasib rəqiblərdəndi. Mən Ronaldonun bu səbətdən İsraili çıxarmasını qətiyyən istəmirdim. Amma onlarla oynamaq məcburiyyətindəyik. İsraillilər bizim üçün çox qeyri-münasib oyun sərgiləyən rəqiblərdəndi. Mən bu komanda ilə 2004-cü ildəki yoldaşlıq oyununu yaxşı xatırlayıram. Onlara 0:6 hesabı ilə uduzduğum həmin gecədə bizə heç başımızı qaldırmağa imkan vermirdilər. Özü də İsrail yığması rəqibi qiymətləndirməmək, motivasiya kimi amillərə diqqət yetirən komanda deyil.
Şimali İrlandiya
Son vaxtlar bu ölkənin futbolu diqqət çəkən dərəcədə inkişaf edib. Onları asan rəqib hesab etmək olmaz. Komandamız bu rəqiblə iki dəfə qarşılaşıb və hələ ki, bir dəfə də olsun rəqib qapısına yol tapa bilməyib. Onların klub futbolunda da güclü inkişaf var. İrlandlar ümumiyyətlə çox maraqlı futbol oynayırlar. Onlarla oyunlarda psixoloji hazırlıqdan çox şey asılı olacaq.
Lüksemburq
Altıncı səbətdə oynamaq istəmədiyim iki komanda var idi: Qazaxıstan və İslandiya. Onlar səviyyəcə qalan bütün komandalardan yüksəkdədi. Lüksembur normal variantdı. Azərbaycan üçün bu komandayla oyunlar çox vacib əhəmiyyət daşıyacaq. Təbii ki, biz bu komandayla görüşlərdə maksimum xal almağa çalışmalıyıq.
Biz
Bizim yığma üçün hazırda AÇ-2012-nin seçmə mərhələsini major notlarda bitirmək daha vacib əhəmiyyət kəsb edir. Qarşıda 4 oyunumuz var. Biz bu oyunlarda xal toplamağa borcluyuq. Əminəm ki, bu oyunlardakı çıxışımız növbəti seçmə tsikldəki oyunumuza da təsirsiz ötüşməyəcək. Amma növbəti seçmə mərhələdə neçənci yeri tutacağımıza, neçə xal toplayacağımıza dair proqnoz vermək istəmirəm.
