3 avqust 2011 01:34
Mirça Rednikdən XL azarkeşlərinə dəstək
"Xəzər Lənkəran" "Sumqayıt Şəhər"lə oyunun hazırlıqlarını davam etdirir. Azerisport.az xəbər verir ki, açılış turunda debütantla qarşılaşacaq Lənkəran klubu ötən gün "Fırtınalar meydanı"nın yardımçı meydançasında axşam məşqinə çıxıb.
Bir gün öncə olduğu kimi azarkeşlər yenə məşqə buraxılmayıb. Mühafizəçilərin qapıları bağlamasından hirslənən azarkeşlər bir neçə dəfə "Rednik, Rednik" qışqıraraq rumın mütəxəssisi köməyə çağırıb. Bundan sonra Rednik tərcüməçisi ilə birgə meydançanın kənarına gələrək mühafizçəilərdən qapıların açılmasını tələb edib. Baş məşqçinin istəyi ilə qapılar açılıb və azarkeşlər məşqə buraxılıb.
Məşqdə Kamal Bayramov, Orxan Sadıxlı, Alim Qurbanov, Şəhriyar Xəlilov, Julius Vobay, Adrian Pit, Andrey Mureşan, Rikardo Qomeş, Eder Bonfim, Joao Pinto, Katalin Doman, Elvin Beqiri, Emeka Opara və daha üç gənc futbolçu iştirak edib. Kamran Ağayev, Rahid Əmirquliyev, Elnur Allahverdiyev və Elnur Abdullayev milli komandanın toplanışında olduğundan məşqə qatılmayıb. (12-ci oyunçu)
