3 avqust 2011 13:48
AFFA-dan təbliğat xarakterli turnir
Britaniyanın ölkəmizdəki səfirliyi gələn il Londonda keçiriləcək Olimpiya və Paralimpiya Oyunlarını Azərbaycanda təbliğ etmək məqsədi ilə ‘BİR İL‘’ kampaniyası çərçivəsində Azərbaycan Milli Olimpiya Komitəsi və Azərbaycan Milli Paralimpiya Komitəsi ilə bir sıra tədbirlər həyata keçirir. Azerisport.az xəbər verir ki, səfirlik bu dəfə Milli Olimpiya Komitəsi, Milli Paralimpiya Komitəsi və Azərbaycan Futbol Federasiyaları Assosiasiyasının dəstəyi ilə Mərdəkanda yerləşən AFFA-nın Futbol Mərkəzindəki çimərlik futbolu meydançasında futbol turniri təşkil edəcək.
Turnirdə altı komanda – Britaniya Səfirliyini təmsil edən London 2012, Milli Olimpiya Komitəsi, Milli Paralimpiya Komitəsi, Azərbaycan Futbol Federasiyaları Assosiasiyası, Britaniya-Azərbaycan Məzunlar Birliyi və idman jurnalistlərindən ibarət Mətbuat komandası iştirak edəcək. Oyunlar avqustun 6-da, saat 18.00-dan 20.00-dək keçiriləcək.
Qeyd edək ki, Yay Olimpiya Oyunları 2012-ci ildə iyulun 27-dən avqustun 12-dək, Paralimpiya oyunları isə avqustun 29-dan sentyabrın 9-dək London şəhərində keçiriləcək.
