5 avqust 2011 15:48
Foqts: Azərbaycan klublarının çıxışından narazıyam
Futbol üzrə Azərbaycan yığmasının baş məşqçisi Berti Foqts azerisport.az müxbiri ilə söhbətində yerli klubların avrokuboklardakı çıxışı, xüsusən “Qarabağ” - “Brugge” oyunu və yığma oyunçuları haqda suallarını cavablayıb.
“Bilmirəm niyə onlar ancaq sonda yaxşı oynadılar. Bütün oyunu belə oynamaq lazım idi. “Qarabağ”ın niyə məhz son dəqiqələrdə bütün komanda ilə hücuma keçməyini anlamıram. “Qarabağ” “Brugge”ni 3:0 hesabı ilə məğlub edə bilərdi. Sadəcə alınmadı”, deyə cavab qarşılaşmasını şərh edən Foqts bildirib.
Onun sözlərinə görə Qurban Qurbanovun yetirmələri riskə getməli idilər: “Risk etmək lazım idi. Oyunun əvvəlindən va-banka getmək lazım idi. Hər şey tamamilə fərqli yekunlaşa bilərdi”, deyə alman mütəxəssis hesab edir.
Azərbaycan klublarının avrokubok mövsümünü qiymətləndirən Foqts qısa danışıb: “Nə deyə bilərəm? Mən cari avrokubok mövsümündən narazıyam”.
Makedoniya ilə qarşıdakı yoldaşlıq oyununa toxunan Foqts “Qarabağ”ın oyunçularının yorğunluq faktoruna toxunaraq bildirib ki, belə hallar maneə olmamalıdı: “Bu beynəlxalq yoldaşlıq oyunu olacaq. Buna görə də yığma yüksək səviyədə oynamalıdı. Futbolçular isə həftədə iki dəfə oynamağı öyrənməlidilər. Bütün dünyada bu, belədi. Belə praktika geniş yayılıb. Bəzən futbolçuların beş günə iki oyun oynaması da istisna deyil. Makedoniya ilə oyuna hələ vaxt var. Uşaqlar özünə gələ bilər”.
Rəşad Sadiqovovun qardaşının vaxtsız vəfatı səbəbi ilə yoldaşlıq oyununda iştirak etməməsinə gəlincə Foqts bu mövzuda hər şey ola biləcəyini bildirib.
