6 avqust 2011 23:56
Vaqif debütdəсə "fərqləndi", komandası uduzdu (YENİLƏNİB)
Bu gün Rusiya Premyer Liqasında 19-cu turun oyunları keçirilib. Azerisport.az xəbər verir ki, Azərbaycan yığmasının hücumçusu Vaqif Cavadovun çıxış etdiyi “Volqa” doğma divarlar arasında “Rostov”u qəbul edib.
Qeyd edək ki, Vaqif məhz bu günkü oyunda Rusiya Premyer Liqasında debüt edə bilərdi. O, xeyli müddətdi “Volqa”ya transfer olunsa da, hələlik rəsmi oyunlarda debüt edə bilməmişdi. Çünki rəsmi olaraq yalnız dünən sifariş olunmuşdu. Bu gün baş məşqçi Dmitri Çerışev digər yeni futbolçularla yanaşı Cavadovun da xidmətindən yararlana bilərdi.
Gözlənilən kimi də oldu. Rusiyalı mütəxəssis həmyerlimizi əsas heyətdə meydana buraxmasa da, ehtiyat oyunçular skamyasında yer vermişdi. 60-cı dəqiqədə isə Çerışev Sanjar Tursunovun əvəzində meydana Vaqifi buraxdı. Lakin təəssüf ki, Vaqifin debüt matçı uğursuz alındı.
Cavadov meydana çıxandan az sonra ilk matçındaca "fərqləndi". O, matçın 71-ci dəqiqəsində rəqib oyunçuya qarşı kobudluğa görə sarı vərəqə aldı.
Yeri gəlmişkən, "Rostov"un heyətində "İnter"in sabiq oyunçusu Dmitri Kruqlov ilk dəqiqələrdən meydandaydı və Vaqifə qarşı mübarizə aparırdı. Elə qarşılaşmada qələbə qazanan da Kruqlovun komandası oldu. Qonaqların son dəqiqələrdə hətta iki futbolçusu meydandan qovulsa da, minimal hesablı qələbəni qoruyub saxlamağı bacardılar.
Xatırladaq ki, Vaqif bu günə kimi "Volqa"nın sadəcə yoxlama matçlarında meydana çıxmaq şansı qazansa da, qol vura bilməmişdi.
Rusiya Premyer Liqası
19-cu tur
Volqa - Rostov - 0:1 (0:0)
Qol: Brakamonte, 82.
