7 avqust 2011 01:31
AZAL-ın futbolçusu Kipr klubunda (FOTO)
Şimali Kipr Türk Cumhuriyyətinin "Mağusa Türk Gücü" klubu Azərbaycan Premyer Liqasında top qovan futbolçunu heyətinə qatıb. Azerisport.az xəbər verir ki, Kipr təmsilçisi AZAL-dan ayrılan Pius İkedia ilə müqavilə imzalayıb.
AZAL-la yanaşı indiyədək Hollandiyanın "Ajax", "AZ Alkmaar", "Groningen", "Roosendaal", "Vaalvayk" klublarında çıxış etmiş Pius ötən gün yeni komandası ilə iki illik müqaviləyə imza atıb.
İmza mərasimində çıxış edən "Mağusa Türk Gücü"nün prezidenti Yahya Kurt çempionluq yarışına çıxdıqları mövsümdə komandanın uğurlarına dəstək verəcək futbolçu transfer etdiklərini bildirib. İkedianın Kiprə gəlişinin heç də asan olmadığını bildirən Yahya Kurt dünyanın heç bir ölkəsi tərəfindən tanınmayan dövlətdən transfer təklifi alan futbolçuya bəzi güzəştlərin ediləcəyini deyib.
Komandanın baş məşqçisi Hasan Topaloğlu isə dünyaca məşhur bir futbolçu ilə eyni komandada forma geyiniməyin yerli futbolçuları həyacanlandırdığını bildirib.
Sonda çıxış edən İkedia dünya futbolundan kənarlaşdırılmış bu gözəl ölkədə bu idman növünün inkişafına dəstək verməyə gəldiyi bildirib.
Qeyd edək ki, 31 yaşlı İkedia AZAL-a 2010-cu ildə Hollandiyanın "Roosendaal" klubundan gəlmişdi. O, əvvəllər Nigeriyanın "Bendel", Hollandiyanın "Ajax", "Groningen", "AZ Alkmaar", "Vaalvayk" və Ukraynanın "Metallurg" (Donetsk) klublarında çıxış edib. 31 yaşlı hücumçu Nigeriya yığmasında 15 oyunda 1 qol vurub.
