8 avqust 2011 13:16
Elçin Məmmədovu Lənkəranda gizli kamerayla çəkiblər
Premyer Liqanın ilk turunda "Fırtınalar meydanı"nda keçirilən "Xəzər Lənkəran" - "Sumqayıt Şəhər" oyunu zamanı matçın dördüncü hakimi Elçin Məmmədov azarkeşlərin diqqət mərkəzində olub. Azerisport.az xəbər verir ki, "Xəzər Lənkəran"ın ev oyunlarında daim stadionun "K" sektorundakı azarkeşlərdən biri oyunboyu Məmmədovun hərəkətlərini həvəskar kamera ilə çəkirmiş.
Bu haqda adının açıqlanmasını istəməyən həmin azarkeş məlumat verib: "Elçin Məmmədov "Xəzər Lənkəran"a zərbə vurmaq üçün həmişə xüsusi missiyanı yerinə yetirir. Uzağa getməyək, 2009/10 mövsümüboyu Ağasəlim Mircavadovun rəhbərliyində "Xəzər Lənkəran" ümumilikdə 6-dəfə məğlub olmuşdusa, həmin oyunların 5-də Elçin Məmmədov baş hakim olmuşdu və onun ən çox sarı vərəqə göstərdiyi qapıçı da Kamran Ağayev idi. Mirça Rednikin gəlişindən sonra isə o iş mexanizmində bəzi dəyişikliklər edib dördüncü hakim qismində klubumuza zərbə vurmağa nail olub. İki misalla fikrimi çatdırmağa çalışacağam. "Neftçi" üzərində 4:3 hesablı qələbə ilə bitən kubok oyununda Mirça Rednikin papağını yerə tullaması zamanı güya onun söyüş söyməsi iddiası ilə dördüncü hakim Elçin Məmmədov matçın baş hakimi Anar Salmanova yanlış məlumat vermiş və özü də protokolda bu haqda yazmışdı. Yenə kubok yarışmasının "Bakı" ilə paytaxtda keçirilən cavab oyununda protokola iftira dolu qeydlər edərək guya Mirça Rednikin Azərbaycan xalqını təhqir etməsini iddia etmişdi. Bunları nəzərə alaraq mən də bu mövsümün ilk oyununda Elçini kameranın nişangahında saxladım. Düzü Məmmədov bu oyunda bir şey edə bilmədi, ancaq onu da deyim ki, o, 72 dəqiqə Mirça Redniki izləmişdi. Rednikin az qala hər hərəkətinə elə diqqətlə baxırdı ki, bəzən oyunu da yaddan çıxarırdı". (12-ci oyunçu)
