10 avqust 2011 13:00
“Qəbələ Azərbaycan futbolunun gələcəyidi”
“Qəbələ”nin qapıçısı Pavel Doroşev azerisport.az saytına müsahibəsində “Bakı” ilə mövsümün ilk oyunundan, eləcə də qarşıda duran vəzifələrdən danışıb.
- Çempionatın ilk turunda “Bakı” ilə evdə heç-heçəyə razılaşsaz da, komandanız xoş təsir bağışladı...
- Biz “Bakı”dan daha üstün idik. Çoxlu düşünülmüş qol vəziyyətləri yaradırdıq. İndi “Qəbələ” heç vaxt olmadığı qədər güclüdü. Sadəcə qol vəziyyətlərini reallaşdırmaq baxımından problemlərimiz var. Rəqib də bir-iki qol vəziyyəti yaratdı. Amma biz onları zərərsizləşdirməyi bacardıq. Bütövlükdə komandanın oyunu mənim də xoşuma gəldi. Xüsusilə də futbolçularımızın meydandakı davranışı. Yeganə çatışmayan qol oldu.
- Bir baş üstün olduğunu dediyiniz “Bakı”ya ötən mövsüm iki dəfə uduzmuşduz...
- Düzdü, onlar məhz həmin uğurları sayəsində ilk altılığa düşdülər, biz isə yox. Amma bu dəfə belə olmayacaq. İlk oyunda da bizim onlara qarşı necə mübarizə apardığımızı hamı gördü. Hər kəs “Qəbələ”nin yeni mövsümə necə başladığından xəbərdardı. Biz vulkan kimi olacağıq.
- Rəqib də nəticədən razı görünürdü...
- Onlar razı ola bilərlər, biz isə qətiyyən yox. Nəzərə alsaq ki, biz qələbə qazanmağa daha çox yaxın idik, bu, normaldı. Ötən mövsüm bu, başqa cür ola bilərdi. Bu mövsüm isə biz çox dəyişmişik. Nəzərə alsaq ki, komandaya bu qədər pullar xərclənir, belə infrastruktur yaradılır, bundan artığına nail olmağa borcluyuq. “Qəbələ” Azərbaycan futbolunun gələcəyidi.
- Komandanın qarşısına qoyulan vəzifə yəqin ki, artıq bəllidi?
- Ancaq çempionluq və əlbəttə ki, avrokuboklara vəsiqə. İlk vəzifənin öhdəsindən gəlsək, şübhəsiz ki, ikinci məqsədimizə də avtomatik olaraq çatacağıq. Başqa məqsədimiz ola da bilməz.
- Həmyerliniz Maris Verpakovski ikinci hissədə az qala sizi məyus edəcəkdi. Amma şansını boşa verdi...
- Mənə qol buraxmamaq xoşdu. Şadam ki, mövsümün ilk oyununda bu istəyimə çata bildim. Həmin epizodda isə sadəcə bəxtim gətirdi. Zərbə çox təhlükəli idi.
