10 avqust 2011 17:25
Slavço Georgiyevski: Azərbaycanlılar çox da səbrli deyillər
Makedoniya yığmasının yarımmüdafiəçisi Slavço Georgiyevski Azərbaycanla keçiriləcək beynəlxalq yoldaşlıq oyunu haqda fikirlərini bölüşüb. Azerisport.az xəbər verir ki, o, ölkəsindən olan jurnalistlərə açıqlamasında bunları dilə gətirib:
"Berti Foqtsun yığmanın baş məşqçisi postuna gəlişi ilə azərbaycanlı futbolçular daha intizamlı oynamağa başlayıblar. Onlar rəqibi daim pressinqdə saxlayırlar. İndi onlar "vur-qaç" taktikasından az istifadə edirlər və daha çox qısa ötürmələrə üstünlük verirlər. Makedoniya ilə oyuna çağırılmış "Neftçi"dəki həmkarlarım qələbə üçün sona qədər oynayacaqlarını dedilər", deyə Georgiyevski sözə başlayıb.
Makedoniya yığmasındakı dəyişikliklərə gəlincə yarımmüdafiəçi Georgiyevski bunları bildirib: "Yığmadakı gəncləşdirməyə şadam. Yaxşı gənclərimiz var və onlarda futbolçu üçün müsbət keyfiyyətlər görürəm. Düşünürəm ki, baş məşqçi Boban Babunski yığmaya yalnız gəncləri çağırmaqla düzgün seçim edib. Biz, yəni yığmada çıxış təcrübəsi olanlar gənclərə kömək etməliyik".
Ümumilikdə Azərbaycan futbolu haqda danışan Georgiyevski Azərbaycanda idmanın bu sahəsinə böyük pul qoyuluşu edildiyini və bu göstəricidə ölkəmizin Makedoniyanı üstələdiyini bildirib: "Azərbaycanda futbola çox böyük investiya qoyuluşu var və gözəl infrastruktur yaradılır. Bu müstəvidə onlar bizi hətta ötüblər. Ancaq onlar çox da səbrli deyillər. Nəticəni tez görmək istəyirlər. Ümumiyyətlə isə Azərbacanda nəinki futbola, başqa sahələrə də investisiya yatırılır”.
"İndi Bakı ikinci Dubay kimidi. Burada qeyri-adi layihələr var. Demək olar ki, hər addımda nəsə yeni tikili gedir. Məsələn, artıq alovun dillərinə bənzər bina inşa edilib. Üstəlik burada gələn il "Eurovision" mahnı müsabiqəsi keçiriləcək ki, bu da gələcək inkişafa bir təkandı" – deyə, Georgiyevski qeyd edib.
"Neftçi"nin yarımmüdafiəçisi karyerasına da toxunub: "Düşünürəm ki, futbolda hələ iki il qala bilərəm. Vaxtı ilə Cənubi Koreya, Çin, Kipr, Bolqrıstanda oynamışam. "Neftçi" ilə müqaviləm başa çatdıqdan sonra daha bir il də oynaya bilərəm".
