10 avqust 2011 11:23
“Bir nəfərə görə o boyda zəhmətimiz hədər oldu”
Premyer Liqanın ilk turunda “Kəpəz”ə məğlub olan “Rəvan” son çempion “Neftçi” ilə oyuna hazırlaşır. Azerisport.az xəbər verir ki, ötən turun ən yaddaqalan komandası olan “Rəvan”ın sıralarında yeni transfer olunmuş Takvi Bonq və “Kəpəz”lə oyunun ən yaxşılarından olan Con Pelu məşqlərdə xüsusi ilə fərqlənirlər.
Komandanın baş məşqçisi Bəhmən Həsənov hazırlıqlarda özlərini yaxşı göstərəcəkləri halda Takvi Bonq və qapıçı Artur Kotenkonun “Neftçi” ilə oyunda iştirak etmək şanslarının olduğunu deyir: “Bir nəfərə görə o boyda komandanın zəhməti hədər oldu. Düzdü, Bakıya qayıdanda Kotenko bütün futbolçulardan, komandadan üzr istədi. Amma bu heç nəyi dəyişmir. Başqa cür məğlub olsaydıq, bəlkə də bizə bu qədər təsir etməzdi. Ancaq görüş ərzində üstün oyun nümayiş etdirdiyimiz halda, heç nədən iki qol buraxmağımız bizə çox pis təsir edir. Bununla belə biz "Neftçi" ilə oyunda tam gücümüzü ortaya qoyub qələbə qazanmağa çalışacağıq. Hazırlıqlar da yüksək səviyyədə davam edir”.
“Rəvan”ın ev oyunlarını harada keçirəcəyi ilə bağlı suala isə klubun baş məşqçisi Bəhmən Həsənov belə cavab verib: “Qısa müddətə yüksək səviyyəli ot örtüklü öz stadionumuz istifadəyə veriləcək. Həmin vaxta qədər isə komanda ev oyunlarını ya "Şəfa" stadionunda, ya da "Dalğa Arena"da keçirəcək”.
Avrokuboklarda iştirak etməyi qarşılarına məqsəd qoyduqlarını bildirən B.Həsənov komandaya yeni transferlərin olacağını da vurğuladı. (PFL)
