12 avqust 2011 00:03
Kəpəz qərb derbisində “yalnız qələbə” deyir
Premyer Liqanın ikinci turunun oyunları avqustun 13-də start götürəcək. Azerisport.az xəbər verir ki, turun ilk oyun günündə “Turan” öz evində “Kəpəz”i qəbul edəcək.
“Kəpəz”in mətbuat xidmətinin rəhbəri Məqsəd Rəhimovun verdiyi məlumata görə, “qərb derbisi” öncəsi komandada hazırlıqlar yüksək səviyyədə davam edir: “Komandada yüksək əhval-ruhiyyə hökm sürür. “Kəpəz” “qərb derbisi”ndə yalnız qələbə qazanmaq üçün mübarizə aparacaq. Futbolçularımız hər oyunda sona qədər mübarizə aparır. “Rəvan” ilə oyunda da bunun şahidi olduq”.
O, “Rəvan”la oyuna da münasibətini bildirib: “Bəzi söz-söhbətlər dolaşır ki, “Rəvan”ın qapıçısı qələbəni “Kəpəz”ə “hədiyyə” etdi. Mən bu cür fikirlərlə razı deyiləm. “Kəpəz” sona qədər mübarizə aparıb, zəhmətinin bəhrəsi olaraq qələbə qazanıb. Birinci hissədən sonra futbolçular qələbə qazanmağı qarşılarına məqsəd qoydular. Meydançanın su olması, hava şəraitinin pis olması bizə öz oyunumuzu tapmağa mane olurdu. Lakin oyunun sonlarına yaxın “Rəvan” öz oyun xəttini itirdi və biz də bundan maksimum yararlanıb qələbə topunu vurduq. İki epizodda futbolçularımız topu dirəyə vurdular. Ümumiyyətlə, “Rəvan”la oyunda “Kəpəz” qələbəyə layiq oyun nümayiş etdirdi”.
