12 avqust 2011 00:10
AZAL Xəzər Lənkərana meydan oxudu
“Usim Nduka, Aqil Nəbiyev və Robert Petrov zədəlidi. Viktor İqbekoyi isə ötən tur “Simurq”la oyunda qırmızı vərəqə aldığı üçün növbəti oyuna çıxa bilməyəcək. Bu oyunçuların yoxluğunda “Xəzər Lənkəran”la oyun bir qədər çətin keçəcək”.
Azerisport.az xəbər verir ki, bu sözləri AZAL-ın mətbuat xidmətinin rəhbəri Eldəniz Yusifov PFL-in rəsmi saytına verdiyi açıqlamada komandanın həftəsonu "Xəzər Lənkəran"la keçirəcəyi oyun haqqında danışarkən dilə gətirib. Onun sözlərinə görə, gündə bir dəfə məşq edən komanda “Xəzər Lənkəran”la oyunda meydana yalnız qələbə qazanmaq üçün çıxacaq:
“Statistikada “Xəzər Lənkəran”ın aşkar üstünlüyü olsa da, biz bunu öz xeyrimizə dəyişəcəyik. Bizim klubumuz “Xəzər Lənkəran”la keçirilən oyunların əksəriyyətində formalaşma mərhələsində idi. Klubun adı da onda başqa idi. Lakin ötən mövsümdən etibarən biz qarşımıza konkret məqsədlər qoymuşuq və “Xəzər Lənkəran” üzərində də ötən mövsüm bir dəfə qələbə qazanmışıq. AZAL-ın heyətində bir çox təcrübəli, güclü futbolçu var. Biz hər oyuna qələbə qazanmaq üçün çıxırıq. Başlıca hədəfimiz isə çempionluqdu. Ən azı 2-ci, 3-cü pilləni tutaraq avrokuboklarda iştirak etməyi qarşımıza məqsəd qoymuşuq”.
