12 avqust 2011 11:50
AZAL - Xəzər Lənkəran duellərində ilk dəfə
Premyer Liqanın ikinci turunda “Xəzər Lənkəran” Şüvəlana səfər edəcək. Azerisport.az xəbər verir ki, cənub təmsilçisinin mövsümün ilk səfər oyunundakı rəqibi geridə qalan mövsümü dördüncü yerdə başa vuran AZAL-dı.
Hər iki komanda çempionata qələbə ilə başlayıb. “Xəzər Lənkəran” debütant “Sumqayıt Şəhər”i doğma meydanda 2:1 hesabı ilə üstələmişdisə, AZAL səfərdə “Simurq” üzərində böyük hesablı qələbə qazandı – 3:0. Hər iki komanda mövsüm öncəsi Avropa Liqasında çıxış edib və startdaca mübarizəni dayandırıb.
Tarixə nəzər saldıqda bu rəqibə qarşı “Xəzər Lənkəran”ın çempionatda 7 səfər oyunu keçirdiyini görə bilərik. Bu oyunlardan dördü qələbə ilə, biri heç-heçə ilə, ikisi isə məğlubiyyətlə başa çatıb. AZAL-a qarşı keçirilən son səfər qarşılaşması bu ilin mart ayında baş tutub və “Xəzər Lənkəran“ın 0:1 hesablı məğlubiyyəti ilə nəticələnib.
“Xəzər Lənkəran”ın qeyd olunan rəqib üzərində son səfər qələbəsi isə ötən çempionatın dördüncü turuna təsadüf edir. Komanda həmin görüşdə Elvin Beqirinin cərimə zərbəsindən son dəqiqələrdə vurduğu qol sayəsində minimal hesablı qalibiyyət əldə edib. Komandalar arasında Bakıda keçirilən görüşlərdə ən populyar hesab da elə 1:0-dı. Yeddi oyunun dördündə məhz bu hesab qeydə alınıb – iki dəfə “Xəzər Lənkəran”ın, iki dəfə AZAL-ın xeyrinə.
İlk dəfə olaraq bu komandaların qarşılaşması AZALın Şüvəlan qəsəbəsində yerləşən yeni stadionunda keçiriləcək. Buna qədər müxtəlif mövsümlərdə “Olimpik”, “Olimpik-Şüvəlan” və AZAL adlanan rəqibə qarşı səfər oyunlarını XL “Şəfa” stadionunda keçrib. (Xəzər Lənkəranın rəsmi saytı)
