14 avqust 2011 19:58
Cavadov oynadı, Volqa 1 xal qazandı (YENİLƏNİB)
Bu gün Rusiya Premyer Liqasında 20-ci turun oyunları keçirilir. Azerisport.az xəbər verir ki, Azərbaycan yığmasının hücumçusu Vaqif Cavadovun şərəfini qoruduğu “Volqa” doğma divarlar arasında “Lokomotiv”lə qarşılaşıb.
Qeyd edək ki, həmyerlimizin komandasının durumu heç də yaxşı deyil. Çünki 16 komanda arasında 13-cü pillədə qərarlaşan Nijni Novqorod klubu təhlükəli zonadan uzaqlaşmağa çalışır. Lakin Dmitri Çerışevin rəhbərlik etdiyi kollektiv məğlubiyyətləri sıralamaqda davam edir. Təəssüf ki, ötən həftə Vaqifin debüt etdiyi “Rostov”la 6 xallıq oyunda da “Volqa” məğlubiyyətlə üzləşmişdi.
Cavadov bu dəfə də əsas heyətdə yer almayıb. Lakin onun ən azı ikinci hissədə “Lokomotiv”ə qarşı oynaması mümkün idi. Çünki Çerışev onu ilk "18-liy"ə daxil etmişdi. Gözlənildiyi kimi, 54-cü dəqiqədə Vaqif müdafiəçi Andrey Yeşenkonun əvəzində meydana çıxdı. Lakin həmyerlimiz oyunda olduğu dəqiqələrdə komandasına qələbə qazandıra bilməyib.
Rusiya Premyer Liqası
20-ci tur
14 avqust
Volqa - Lokomotiv - 0:0 (0:0)
65-ci dəqiqədə Vaqif sol cinahla əla keçid etdikdən sonra təhlükəli asma etsə də, rəqib müdafiəçi təhlükəni sovuşdurur
79-cu dəqiqədə Cavadov yenidən cinahıyla sürətlə irəliləyib cərimə meydançasına daxil olsa da, nə ötürmə edə, nə də zərbə vura bilir
