14 avqust 2011 22:18
Sadıqovu Rusiyada məyus etdilər (YENİLƏNİB)
Bu gün Rusiya Premyer Liqasında 20-ci turun oyunları keçirilib. Azerisport.az xəbər verir ki, Azərbaycan yığmasının sabiq baş məşqçisiVaqif Sadıqovun çalışdığı “Anji” səfərdə Moskva “Spartak”ı ilə qarşılaşıb.
Qeyd edək ki, həmyerlimizin komandasının işləri bu mövsüm heç də pis getmirdi. Hər halda 33 xala malik Mahaçqala klubu bu oyuna kimi 5-ci pillədə qərarlaşmışdı və liderlərlə mübarizə aparırdı. Moskva təmsilçisi isə onlardan cəmi 2 xal geri qalırdı. Bu üzdən də sözügedən görüşü 6 xallıq oyun da adlandırmaq olardı.
Lakin qarşılaşma meydan sahiblərinin 3:0 hesablı qələbəsi ilə başa çatıb. Beləcə, Mahaçqala klubunun uğurlu seriyası qırılıb.
Maraq üçün onu da vurğulayaq ki, Sadıqovun komandası əslən azərbaycanlı olan futbolçunun çıxış etdiyi kluba qarşı mübarizə aparırdı. “Spartak”ın heyətində yarımmüdafiəçi Emin Mahmudov çıxış edir. Lakin o, bu qarşılaşmada forma geyməyib.
Rusiya Premyer Liqası
20-ci tur
14 avqust
Spartak (Moskva) – Anji - 3:0 (2:0)
Qollar: Ari, 35, Kombarov, 44, Kozlov, 73
