14 avqust 2011 12:37
Hakimin qanını axıdan fanat Kəpəzi xərcə salacaq
“Kəpəz” dünən Tovuzda keçirilən Premyer Liqanın 2-ci turunun “Turan”la səfər matçındakı qalmaqala görə cərimə olunacaq. Azerisport.az xəbər verir ki, AFFA İntizam Komitəsinin çərşənbə axşamı keçiriləcək iclasında bu məsələ də müzakirəyə çıxarılacaq və orda bu insidentə görə Gəncə təmsilçisinə kəsiləcək cərimənin məbləği müəyyənləşdiriləcək.
Qeyd edək ki, “Turan” – “Kəpəz” matçının ikinci hissəsinin əvvəlində qarşılaşmanın yan xətt hakimi Elşən Acalovun başı yarılıb. Buna isə məhz gəncəli fanatlardan birinin atdığı yad əşya səbəb olub. Nəticədə qarşılaşma 7-8 dəqiqə yubanıb, Acalov isə həkim yardımından sonra idarəçiliyini davam etdirə bilib.
Yeri gəlmişkən, azarkeşlərin hakimlərə qarşı belə münasibətinin ikinci hissədə “Kəpəz”in qapısına təyin olunan penalti ilə bağlı olduğu bildirilir.
