15 avqust 2011 17:40
Azərbaycan klubunda türk baş məşqçi
İran çempionatının birinci liqasında çıxış edən Təbrizin “Foolad” klubunun yeni baş məşqçisi müəyyənləşib. Azerisport.az xəbər verir ki, klub rəhbərliyi türk məşqçi ilə anlaşıb.
Belə ki, Engin Fırat Təbriz klubunun baş məşqçisi təyn olunub. Bununla bağlı açıqlama verən klubun prezidenti Qulamreza Samandar Engin Fıratın komandaya gəlməsi üçün heç bir fədakarlıqdan çəkinmədiklərini bildirib: “Engin Fıratın Təbrizə gəlməsi hamımızı xoşbəxt etdi. Onunla çox böyük hədəflər uğrunda mübarizə aparacağıq. Artıq transfer çalışmalarına başlamışıq. Baş məşqçimizə güvənirik”.
Engin Fırat isə açıqlamasında özünü evindəki kimi hiss etdiyini bildirib: “Burda hamı türkcə danışır. Məndən çox şey gözlənilir, məni sehrbaz kimi tanıyırlar. Hər zaman olduğu kimi çox çalışıb ümidləri puç etməməyə çalışacağam. Əsas hədəfimiz Pro Liqaya çıxmaq və Asiya Çempionlar Liqasına vəsiqə qazanmaqdı. Burda uğurlu işləyib, İran millisinin başına keçmək istəyirəm”.
Qeyd edək ki, 41 yaşlı Engin Fırat 2006-2007 mövsümündə İranın “Saypa” klubunda, 2008-ci ildə İran yığmasında köməkçi-məşqçi işləyib. Daha sonra isə “Sepahan” klubuna başçılıq edən türk mütəxəssis əvvəllər Türkiyənin “Samsunspor”, “Antalyaspor”, “Fenerbahçe”, “Sivasspor”, “Erciyesspor”, Almaniyanın “Eintracht», “Ahlen” və Koreynanın “İnçeon United» klublarında köməkçi məşqçi işləyib.
