16 avqust 2011 00:05
TFF yenə yekun qərar verə bilmədi
Türkiyə Futbol Federasiyası oyun alqı-satqısı ilə bağlı başlanan cinayət işi ilə bağlı qərarını açıqlayıb. Azerisport.az xəbər verir ki, aylardı Türkiyənin gündəmini zəbt edən olaylarla bağlı ötən gün toplaşan futbol qrumunun rəhbərliyi saatlarla davam edən iclasdan sonra qərar qəbul edib.
TFF-nin qərarını mətbuata qurumun rəhbəri Mehmet Ali Aydınlar açıqlayıb. Aydınlar bildirib ki, prokurorluq tərəfindən məhkəmə qərarı ilə gizli aparılan istintaqın əldə etdiyi dəlillər TFF-yə təqdim olunmadığından yekun qərar qəbul edilməyib: "Federasiyamızın İdarə Heyəti bu məqamda qərar verilməsi üçün lazımi dəlilləri əldə edə bilmədiyi və müdafiə haqqının hüquqa uyğun şəkildə istifadəsinə imkan olmadığı üçün hökm verməyi ədalətli hesab etmir. Federasiyanın hüquqa uyğun və ədalətli qərar verməsi üçün gizlilik qərarını qaldırılması şərtdi. Bunun üçün də Cəza Qanununun 175-ci maddəsinə əsasən iddianamənin qəbul edilməsi vacibdi. Ancaq bu halda klub və idarəçilər haqqında bütün dəlilləri görüb, analiz edib, qərar vermək mümkün olacaq. Qısacası federasiya iddianamənin qəbulunu gözləyib, gizlilik qərarının ləğvindən sonra şübhəli klub və şəxslərə müdafiə hüququ tanıyacaq və bundan sonra qərarını verəcək".
Federasiya oyun alverində ittiham olunan klub və şəxslərin cəzalandırılması ilə bağlı qərar qəbul etməsə də, həbs olunan və barələrində həbs qərarı seçilməyən bir sıra idarəçilərin işini Peşəkar Futbol İntizam Komitəsinə göndərib.
