15 avqust 2011 12:46
Premyer Liqamızın daha bir oyunu təxirə salındı
Futbol üzrə Azərbaycan Premyer Liqasının bir oyunu təxirə salınıb. Azerisport.az xəbər verir ki, ölkə çempionatının 4-cü turunun "Sumqayıt Şəhər" - "İnter" oyunu nəzərdə tutulduğu vaxtda keçirilməyəcək.
Bununla əlaqədar olaraq "Sumqayıt Şəhər" rəhbərliyi PFL-ə müraciət ünvanlayıb. Müraciətdə "Sumqayıt Şəhər" klubunun 6 üzvünün U-21 Azərbaycan milli komandasının heyətində Avropa çempionatının seçmə mərhələsindəki oyunlara hazırlıq məqsədi ilə təlim-məşq toplanışında olacaqlarını, 7 üzvünün isə U-17 Azərbaycan milli komandasının heyətində Litvada təşkil olunacaq beynəlxalq turnirdə iştirak edəcəyini nəzərə almaq xahiş olunub.
Məhz bunu əsas tutan PFL-in prezidenti Ramin Musayev "Sumqayıt Şəhər" - "İnter" oyununun 27 avqust 2011-ci il tarixindən başqa tarixə keçirilməsi haqda əmr imzalayıb.
Xatırladaq ki, Premyer Liqanın artıq 1-ci turundan “Neftçi” – “Qarabağ” matçı təxirə salınıb.
