16 avqust 2011 16:00
UEFA Azərbaycan – Qazaxıstan matçının yerini dəyişdirdi
AÇ-2012-nin seçmə mərhələsi çərçivəsində Azərbaycan və Qazaxıstan milliləri arasında sentyabrın 6-da keçiriləcək oyunun yeri rəsmən dəyişdirilib. Azerisport.az xəbər verir ki, bu haqda UEFA-nın rəsmi saytı məlumat yayıb.
Belə ki, qitə futbol qurumunun saytı matçın Tofiq Bəhramov adına Respublika stadionunda baş tutacağını yazıb. Azərbaycan – Qazaxıstan matçı əvvəlcədən elan olunduğu kimi saat 20:00-da başlanacaq.
Qeyd edək ki, öncədən Qazaxıstanla görüşün Lənkəran şəhər mərkəzi stadionunda təşkil olunacağı bildirilirdi. Lakin ot örtüyünün yanması üzündən qarşılaşmanın həmin arenada keçirilməsi məqbul sayılmayıb. Avqustun 12-də AFFA görüşün Respublika stadionunda təşkilinə qərar verdiklərini və bu haqda UEFA-nın da məlumatlandırılacağını bəyan etmişdi.
