18 avqust 2011 13:00
Xəzər Lənkəranda 80-ci legioner və ilk sloveniyalı
Premyer Liqanın 2-ci turu daha bir futbolçunun “Xəzər Lənkəran”da debüt etməsi ilə əlamətdar oldu. Azerisport.az xəbər verir ki, sloveniyalı Deyan Rusiç karyerasında ilk dəfə bu komandanın formasında meydana çıxdı.
AZAL-la səfər oyununun son 9 dəqiqəsində iştirak edən hücumçu “Xəzər Lənkəran”ın tarixinə 132-ci futbolçu kimi düşdü. Bütövlükdə isə, Deyan cari mövsüm komandada debüt edən 6-cı futbolçu oldu. Belə ki, Avroliqa oyunlarında baş məşqçi Mirça Rednik Eder Bonfim, Rikardo Qomeş, Joao Paulo, Tsaba Borbeli və Marius Onofraşa da debüt imkanı vermişdi.
Bu matçadək komandanın şərəfini qorumuş 131 oyunçudan 52-si yerli, 79-u əcnəbi idi. Rusiç bu siyahıya 80-ci legioner kimi düşdü. O, həm də ilk sloveniyalı kimi XL tarixinə düşüb. Belə ki, ona qədər komandada oynamış gəlmələrin təmsil etdiyi 28 ölkə arasında Sloveniya yox idi. Bu ölkə komandaya oyunçu verən 29-cu ölkə oldu.
“Xəzər Lənkəran” forması geyinən legionerlər ölkələr üzrə: Rumıniya – 18, Braziliya – 10, Türkiyə - 9, Belarus, Serbiya – hərəsi 5, Bolqarıstan - 4, Portuqaliya - 3, Albaniya, Gürcüstan, Kolumbiya, Litva – hərəsi 2, Çexiya, Estoniya, Fransa, Honduras, İsveç, Kot d’ivuar, Moldova, Nigeriya, Qana, Rusiya, Slovakiya, Argentina, Kosta-Rika, Latviya, Syerra-Leone, Qvineya, Ukrayna, Sloveniya – hərəsi 1.
