18 avqust 2011 02:27
Zeynal Məmmədov: Bakı`da heç bir çaxnaşma yoxdu
“Çempionat yeni başlayıb. Düzdü, iki tur arxada qalıb. Amma komandadan gözlədiyimiz oyunu hələ görə bilmirik. Amma həvəsdən düşmək olmaz". Azerisport.az xəbər verir ki, bu sözləri "Bakı"nın vitse-prezidenti Zeynal Məmmədov deyib.
Klub rəsmisi "Simurq"a qalib gəlməli olduqlarını bildirib: "Qəbələ" elə bir rəqib idi ki, onunla heç-heçə etmək olardı. Ancaq biz "Simurq"u udmalı idik. Futbolçular özləri də təsdiq edir ki, oyunları alınmayıb. Qarşıda "İnter"lə oyun var. Daha yaxşı köklənib, bu qarşılaşmaya hazırlaşmaq lazımdı. Hələ heç nə itirilməyib, oynamaq lazımdı. Komandanın oyununda düzəlişlərin olacağına, öz oyununu tapacağına ümidimiz böyükdü".
Zeynal Məmmədov bütün məsuliyyətin baş məşqçinin üzərində olduğunu deyib: "Yeni kollektiv qrulub. Rəhbərlik olaraq komandanın işinə müdaxilə etmirik. Hər şeyi buraxmışıq məşqçilərin öhdəsinə, hər şeyə o, cavabdehdi. Çalışırıq ki, klubun işləri peşəkar səviyyədə qurulsun. Hər şey baş məşqçiyə həvalə olunub. Rəhbərliyin müdaxiləsi qeyri-mümkündü. Bizdən nə asılıdısa, onu da yerinə yetiririk. Baş məşqçi təlim-məşq toplanışı, oyunçuların seçimi ilə bağlı planları hazırlayıb bizə təqdim edir. Düzdü, rəhbərliyin də üzərinə məsuliyyət düşür. Amma komandaya birbaşa baş məşqçi cavabdehdi. Fikrimcə, ona işləməyə imkan vermək lazımdı".
Məmmədov "Bakı"nı siyahıdan silməyin tez olduğunu bildirib: "Hamı bilsin ki, "Bakı" var. Əgər hər şeyi "Simurq"la oyunla götürürlərsə, onlar çox yanılırlar. Hər bir komandanın belə oyunu ola bilər. "Bakı" öz gücünü göstərəcək. Komandamız yenə çempionluğa və kuboka oynayır. Klubda heç bir çaxnaşma yoxdu. Fikrimcə, baş məşqçiyə və oyunçulara özlərini toparlamaq üçün vaxt vermək lazımdı".
