19 avqust 2011 13:01
Kəpəz – Qarabağ duellərində 9 illik sindrom
“Qarabağ” bazar günü Premyer Liqanın 3-cü turunda “Kəpəz”lə qarşılaşacaq. Azerisport.az xəbər verir ki, tarixini 1992-ci ildən götürən bu rəqabətdə 38-ci duel baş tutacaq (4 oyun kubokda).
0:0 hesabıyla bitən ilk oyundan etibarən tərəflər 2006-ci ilə qədər çempionatlarda fasiləsiz 31 dəfə qarşılaşıblar (reqlamentlə əlaqədar olaraq 1993-cü ildə keçirilən 2-ci çempionatda tərəflər qarşılaşmayıblar). Ötən mövsüm elitaya qayıdan Gəncə klubuyla daha 2 oyun baş tutub.
İndiyə kimi baş tutan 33 oyunda gəncəlilərin üstünlüyü diqqəti cəlb edir. “Qarabağ”ın 12 qələbəsinin qarşılığında gəncəlilər 14 dəfə sevinən tərəf olub. 7 görüşdə isə komandalar 1 xala razı olublar. Topaların fərqinə gəlincə, ağdamlıların vurduğu 38 qolun qarşılığında gəncəlilər bu rəqini 47 dəfə məyus ediblər.
Lakin “Qarabağ” artıq 9 ildi bu rəqibinə məğlub olmur. 2001-2002 mövsümündə alınmış 0:3 hesablı məğlubiyyətdən sonra Ağdam klubu baş tutan 8 qarşılaşmada rəqibinə cəmi 2 dəfə 1 xal almasına imkan verib, 6 oyunu qələbəylə başa vurub.
Ötən mövsümdə də “Qarabağ” hər 2 oyunda qələbə qazandı. İlk dövrədə Tofiq Bəhramov adına respublika stadionda baş tutmuş ev oyununda 3:0-lıq qələbə qeydə alındı. Rəşad Sadiqov, Georgi Adamiya və Rauf Əliyev mövsümdəki ilk böyükhesablı qələbəni məhz həmin oyunda rəsmiləşdirmişdi. Bu il fevralın 20-də Gəncədə baş tutmuş cavab görüşündə isə Adamiyanın vurduğu yeganə qol 3 xal gətirmişdi.
“Qarabağ”ın mətbuat xidməti
