19 avqust 2011 15:00
Neftçinin 20 yetirməsi yığmaya dəvət olundu
"Neftçi"nin 20 yetirməsi avqustun 21-22-dən etibarən Azərbaycanın müxtəlif yığma komandalarına dəvət olunub. Azerisport.az xəbər verir ki, bu barədə paytaxt klubunun rəsmi saytı məlumat yayıb.
Məlumatda bildirilir ki, klubun altı yetirməsi bu ayın 22-dən 24-dək Azərbaycanın əsas milli komandasının heyətində təlim-məşq toplanışında iştirak edəcək. “Neftçi” üçün sevindirici hal ondan ibarətdi ki, əsas yığmada oyunçularının sayı artıb. Rail Məlikov, Ruslan Abışov, Ruslan Əmircanov, Cavid Hüseynov və “ağ-qaralar”ın İngiltərənin "Everton" klubundakı yetirməsi Araz Abdullayevlə yanaşı, Rəşad Abdullayev də milli komandanın düşərgəsində olacaq.
"Neftçi"nin 8 yetirməsi isə Azərbaycanın 21 yaşadək yığmasına dəvət alıb. Mirhüseyn Seyidov, Cavid İmamverdiyev, Tərlan Quliyevlə yanaşı, "Sumqayıt Şəhər" klubuna icarəyə verilmiş futbolçular - Eşqin Quliyev, Orxan Həsənov, Kami Nurəhmədov və Emil Balayev, eləcə də Türkiyənin "Erciyesspor" klubunda top qovan Amit Quluzadə U-21-in heyətində Almaniyanın Frankfurt şəhərində keçiriləcək təlim-məşq toplanışına çağırılıb. "Neftçi"nin əsas komandasının üzvləri - Seyidov, İmamverdiyev və Quliyev avqustun 28-dən, digərləri isə 22-dən toplanışa qatılacaqlar.
"Neftçi"nin daha 6 üzvü – Fəhmin Muradbəyli Kamran Nəcəfzadə, Elməddin Məmmədov, Pərviz Qaraxanov, Zeynal Zeynalov və Ceyhun Cəfərov isə Azərbaycanın U-16 və U-15 yığmalarına çağırılıblar.
