20 avqust 2011 14:37
Adamiyanın proqnozu: Nəticədən asılı olmayaraq maraqlı oyun
“Qarabağ” sabah Premyer Liqanın 3-cü turu çərçivəsində “Kəpəz”lə qarşılaşacaq. Azerisport.az xəbər verir ki, Gəncə klubuyla görüşə komanda çoxsaylı itkilərlə yollanıb.
Buna baxmayaraq əyalət derbisinə yetərincə maraq var. Ötən mövsüm tərəflərin Gəncədə baş tutmuş oyunu olduqca gərgin alınmış, 2-ci hissədə Adamiya fərdi ustalığı sayəsində vurduğu qolla komandasına qələbə gətirmişdi. Ötən mövsümün bombardiri sabah da komandasının əsas ümidlərindən biri olacaq. Gürcü forvard klubun rəsmi saytına açıqlamasında 3-cü turun oyununu dəyərləndirib:
“Kəpəz”lə oyun çətin olacaq. Komandamızın bir neçə üzvü bu oyunda meydana çıxmayacaq. Üstəlik, gəncəlilər evdə yaxşı təsir bağışlayır. Azarkeş dəstəyindən də yararlanmaq istəyəcəklər. Meydanın durumu da elə də yaxşı deyil. Amma bu, o demək deyil ki, biz artıq oyuna məğlub çıxmışıq. “Qarabağ” istənilən halda meydana qələbə üçün çıxır. Meydana çıxacaq bütün futbolçularımızla da qələbə oynayacağıq. Bu, futboldu. Hər şey ola bilər. Çempionatın startında itirilənləri sonradan sığortalamaq mümkün olsa da, qazanılacaq xallar da sonradan çox xeyrimizə ola bilər. Ona görə də baxımlı oyun olacağını düşünürəm. Nəticədən asılı olmayaraq meydanda maraqlı futbol olacaq”.
