21 avqust 2011 14:00
AZAL Qəbələyə texniki məğlubiyyət tələb edir
Premyer Liqanın 3-cü turunun “Qəbələ” – AZAL matçının təşkili və keçirlməsi ilə bağlı nöqsanlar, oyunun gedişində və oyundan sonra baş verən hadisələr AZAL PFK-nı narazı salıb. Azerisport.az xəbər verir ki, bu səbəbdən klub rəhbərliyi AFFA-nın Nizam-İntizam Komitəsinə şikayət məktubu göndərərək öz xahiş və tələblərini adı çəkilən qurumun üzvlərinə çatdırıb. AZAL PFK-nın prezidenti Vaqif Qasımovun imzaladığı şikayət məktubda əvvəlcə tikintisi hələ də davam edən stadionda çatışmazlıqlara toxunulub:
“Hələ matdan öncə PFL-in Texniki-İdman şöbəsinin direktoru Məlik Həsənovla əlaqə saxlayaraq stadionda təhlükəsizlik tədbirlərinin çox aşağı olmasını, azarkeşlərlə meydança arasında arakəsmənin yoxluğunu, üstəlik azarkeşlərin əyləşdiyi yerin çınqıl daşları ilə əhatələnməsini onun nəzərinə çatdırdıq. Heç matçın videoçəkilişini aparmaq üçün kamerlalarımız üçün yer də yox idi. Bundan başqa, paltardəyişmə otağından meydançaya getmək üçün təxminən 5 dəqiqə yol qət etmək lazımdır. Özü də futbolçular azarkeşlərin və rəqib komandanın nümayəndələrinin arasında keçməli olur ki, bu zaman onlar təhqirə məruz qalırlar. “Qəbələ”nin oyunçusu Mahir Şükürovun fasilə zamanı təhqiredici sözlərlə Zohair Benouahiyə hücum çəkərək onu vurmağa cəhd göstərməsi də buna əyani nümunədir. Oyunun gedişi və sonra baş verən hadisələr də iradlarımızın düzgün olduğunu təsdiqlədi. Yeri gəlmişkən, bu meydançanı qəbul edən PFL-in komissiyasının üzvləri müsbət rəy verdiklərinə görə cəzalandırılmalıdı”.
AZAL rəhbərliyi daha sonra “Qəbələ” azarkeşlərinin davranışlarından da narazılıq bildirib: “83-cü dəqiqədə AZAL-ın vurduğu qolu hakim qeydə almadı. Biz bu epizodda hakimin çıxardığı qərarla tam razıyıq və heç bir etirazımız yoxdur. Ancaq bundan sonra azarkeşlərin futbolçularımızı daşa basması və birdən-birə 5 oyunçunu zədələməsi bizdə ciddi narazılıq yaratdı. Hətta atılan daşlardan biri yan xətt hakimi Azər Əsgərovun başına dəydi. Özü də bütün hadisələr AFFA Hakim-İnspektorlar Komitəsinin sədri Gülağa Cabbarovla Hakimlər Komitəsinin sədri Xaqani Məmmədovun gözləri qarşısında baş verdi. Fikrimizcə, oyunun baş hakimi həmin anda oyunu saxlamalı və futbolçuları meydançadan çıxarmalı idi. Çünki AZAL-ın futbolçuları 10 dəqiqəyə yaxın vaxt ərzində qorxu və təhqir altında oynamağa məcbur edildi”.
Sonda klub rəhbərliyi AFFA NİK-ə öz konkret mövqeyini bildirib: “Sizdən xahiş edirik ki, oyun zamanı baş verən neqativ hadisələri ciddi araşdırıb 19.08.2011-ci il tarixdə keçirilən “Qəbələ”-AZAL matçının nəticəsinin ləğvi və “Qəbələ” komandasına texniki məğlubiyyət verilməsi məsələsinə baxasınız”.
