21 avqust 2011 12:38
Türkiyə Superliqası yeni formatla keçiriləcək
Türkiyə Superliqası yeni mövsümdən fərqli formatla keçiriləcək. Azerisport.az xəbər verir ki, bu haqda Türkiyə Futbol Federasiyasının prezidenti Mehmet Ali Aydınlar açıqlama verib.
Son yaşanan hadisələrdən sonra Türkiyə futbolunun imicini yenidən özünə qaytarmağa çalışan Aydınlar bunun çıxış yolunu Superliqanın formatının dəyişdirilməsində görüb. Aydınların sözlərinə görə, yeni mövsümdən etibarən Superliqada ilk 4 yeri tutan komandalar öz aralarında "play-off" oyunları oynayacaq. Məhz bundan sonra Çempionlar Liqasına gedəcək komandaların adına aydınlıq gələcək.
"Play-off" görüşlərindən sonra birinci yeri tutan komanda birbaşa Çempionlar Liqasına getmək, ikinci yeri tutan klub isə ÇL-in "play-off" mərhələsində oynamaq imkanı qazanacaq.
Bu yarışda üçüncü pilləni tutan komanda Avroliqaya gedəcəyi halda, dördüncü yerin sahibi isə gözləməli olacaq. Çünki Superliqanı 5-ci və 8-ci pillədə başa vuran 4 komanda da öz aralarında "play-off" oyunları keçirəcək. Burada qalib olan tərəf isə ÇL uğrunda yarışmada 4-cü pilləni tutan komanda ilə neytral meydanda oyun keçirəcək.
Məhz bu oyundan sonra Avroliqaya gedəcək növbəti komandanın adı müəyyənləşəcək. Türkiyə kubokunun sahibi isə birbaşa Avroliqada çıxış edəcək.
