24 avqust 2011 13:12
Azərbaycan FİFA reytinqində yenə gerilədi
FİFA dünya yığmalarının növbəti reytinq siyahısını açıqlayıb. Azerisport.az xəbər verir ki, Azərbaycan millisi sözügedən siyahıda geriləyib.
Belə ki, Berti Foqtsun komandası 1 pillə geriləyərək 112-ci sıraya düşüb. Hazırda komandamızın hesabında 272 reytinq xalı var. Ötən ayla müqayisədə millimizin hesabından 10 reytinq xalı silinib.
Millimizin AÇ-2012-nin seçmə mərhələsindəki rəqiblərinə gəlincə, Almaniya 1330 xalla 3-cü pillədəki yerini qoruyub. Türkiyə də 811 xalla əvvəlki mövqeyində - 24-cü yerdə qalıb. 675 xala malik Belçika yığması da toxunulmazdı – 37-ci pillə. Avstriya yığması isə millimiz kimi geriləmək məcburiyyətində qalıb. 2 pillə geriləyən avstriyalılar 472 xalla 68-cidilər. 227 xala malik Qazaxıstan da 126-cı pillədəki mövqeyini qoruyub.
DÇ-2014-ün seçmə mərhələsindəki rəqiblərimizin də mövqeyinə diqqət yetirək. Portuqaliya 1 pillə geriləsə də, 1060 xalla 8-ci yerdə gedir. 940 xala malik Rusiya isə 5 pillə irəliləyib və 13-cüdü. İsrail əvvəlki ayda olduğu kimi 746 xalla 32-cidi. Şimali İrlandiya 3 pillə irəliləyişə nail olub və hazırda 545 xalla 59-cudu. Lüksemburq isə 211 xalla 128-ci pillədəki mövqeyini qoruyub.
Bütövlükdə isə reytinq siyahısına Hollandiya yığması rəhbərlik edir - 1596 xal. Son dünya və Avropa çempionu İspaniya isə geriləyərək 2-ci pilləyə düşüb - 1563 xal. Almaniya üçüncüdü - 1330 xal. 2 pillə irəliləyən İngiltərə 4-cü yerə çıxıb - 1177 xal. Uruqvay 1174 xalla 5-ci pillədəki mövqeyini qoruyub. 2 pillə geriləyən Braziliya isə 6-cıdı - 1156 xal. 1 pillə irəliəyən İtaliya 1110 xalla 7-cidi. Portuqaliya 1060 xalla 8-cidi. 1117 xala malik Argentina 1 pillə irəliləyib və hazırda 9-cudu. İlk onluğu 1 pillə geriləyən Xorvatiya qapayır - 1009 xal.
Növbəti reytinq cədvəli sentyabrın 21-də açıqlanacaq.
