24 avqust 2011 11:13
XL tarixinə 6-cı və 133-cü düşən futbolçu
Premyer Liqanın 3-cü turu daha bir futbolçunun “Xəzər Lənkəran”da debüt etməsi ilə əlamətdar oldu. Azerisport.az xəbər verir ki, Azərbaycan yığmasının milliləşən serbiyalı futbolçusu Branimir Subaşiç karyerasında ilk dəfə bu komandanın formasında meydana çıxdı.
“Turan”la matçın ilk dəqiqələrindən meydanda olan Branimirə qədər 132 oyunçu “Xəzər Lənkəran”da çıxış etmişdi. Bununla da serb hücumçu yeni komandasının tarixinə 133-cü futbolçu kimi düşdü.
Branimir cari mövsüm komandada debüt edən 7-ci futbolçu oldu. Belə ki, Avroliqa oyunlarında Eder Bonfim, Rikardo Qomeş, Joao Paulo, Çaba Borbeli və Marius Onofraşa, ötən turda isə Dejan Rusiç buna nail olmuşdu.
Bütövlükdə isə, “Xəzər Lənkəran”ın şərəfini qorumuş 133 oyunçudan 52-si yerli, 81-i əcnəbidi ki, Branimir ölkəsinin bu klubda 6-cı təmsilçisi oldu. Ona qədər serbiyalılar Marinko Petroviç, Milorad Koraç, Miroslav Saviç, Slaven Stankoviç, Uroş Prediç “Xəzər Lənkəran”da oynamışdı.
“Xəzər Lənkəran” forması geyinən legionerlər 29 ölkəni təmsil edir: Rumıniya – 18, Braziliya – 10, Türkiyə - 9, Serbiya – 6, Belarus - 5, Bolqarıstan - 4, Portuqaliya - 3, Albaniya, Gürcüstan, Kolumbiya, Litva – hərəsi 2, Çexiya, Estoniya, Fransa, Honduras, İsveç, Kot d’ivuar, Moldova, Nigeriya, Qana, Rusiya, Slovakiya, Argentina, Kosta-Rika, Latviya, Syerra-Leone, Qvineya, Ukrayna, Sloveniya – hərəsi 1.
