25 avqust 2011 02:18
XL-ın Lənkəranı tərk etməsinin əsl səbəbi bəlli oldu
“Xəzər Lənkəran”ın baza-otelində yanğın baş verməsi barədə məlumat vermişdik. Azerisport.az xəbər verir ki, artıq hadisə ilə bağlı daha ətraflı məlumatlar əldə etmək mümkün olub.
Məlum olub ki, yanğın hadisəsi elə də böyük olmayıb və yalnız elektrik naqillərinin qısa qapanması ilə müşaiyət olunub. Məhz bu səbəbdən otelin yuxarı mərtəblərində elektrik naqillərinin izolyasiya qabığının yanmış iyi binanın koridoruna yayılıb. Yanğının mənbəyi dərhal tapılaraq söndürülüb. Artıq saat 18:30-da hadisənin yaratdığı bütün fəsadlar da aradan qaldırılıb. Elektirk naqilləri dəyişilib və yeni qoruyucular qoyulub.
Məsələ ilə bağlı stadionun direktoru Höccət Hacıyev də ətraflı bilgi verib: “Düzü elə böyük bir hadisə baş verməyib. Elektrikdə qısa qapanma olub. Amma əməkdaşlarımız çevik tərpənərək vaxtında elektrik xəttini kəsmişdilər, naqillərin iyi binada müəyyən qədər qalmışdı ki, artıq o da yoxdur. Binaya zərər dəyməyib. Hazırda baza-oteldə heç bir problem yoxdu. Bir neçə saata hər şey qaydasına qoyuldu”.
Komandanın məhz bu hadisə ilə əlaqədar Lənkəranı tərk etməsi haqda xəbərlərə isə Höccət bəy belə münasibət bildirib: “Komanda Lənkəranda hazırlaşırdı. Lakin güclü yağışdan sonra yardımçı meydançada da hazırlığı davam etdirmək mənasız olduğundan süni örtükdə məşq etmək məqsədəuyğun sayıldı. Axı komandanın növbəti oyunu süni örtüklü “Dalğa Arena”da baş tutacaq. Ona görə də komanda paytaxta yola salındı”.
Qeyd edək ki, Premyer Liqanın 4-cü turu çərçivəsində paytaxtın “Dalğa Arena” stadionunda “Rəvan”la qarşılaşacaq “Xəzər Lənkəran” bu gündən başlayaraq hazırlığını Bakıda davam edəcək. Paytaxtın “Gəncəli Plaza” otelində məskunlaşan komandanın məşqçilər korpusu futbolçularla birgə bu gün saat 17:00-da “Rəvan”ın son oyunlarını izləyərək, rəqibi analiz edəcəklər. Saat 19:00-da isə “Xəzər Lənkəran” “Neftçi”nin keçmiş bazasının süni örtüklü meydançasında axşam məşqinə çıxacaq.
