25 avqust 2011 15:00
Turan almaniyalı qapıçısı ilə yollarını ayırdı
“Turan” türkiyəli qapıçısı Göksu Hasancikdən imtina edib. Azerisport.az xəbər verir ki, Tovuz klubu cəmi bir neçə həftə öncə sıralarına qatıb, müqavilə bağladığı oyunçu ilə yollarını erkən ayırıb.
Buna klub rəhbərliyinin “Qəbələ”nin qapıçısı Anar Nəzirovu 1 illik icarəyə götürməsi səbəb olub. Belədə türkiyəli qolkiperə əlavə pul ödəmək istəməyən “Turan” onunla müqaviləni ləğv etməyə qərar verib. Almaniya pasportuna malik olan futbolçu artıq geri qaytarılıb.
Qeyd edək ki, Premyer Liqanın açılış matçında – “İnter”lə oyunda (0:1) qapısını Ramil Kərimova həvalə edən “Turan”ın “Gəncə” ilə matçdakı (3:1) qapıçısı məhz Hasancik idi. O, Tovuz klubunda cəmi 1 oyunda 90 dəqiqə çərçivə qorumaqla yadda qaldı. “Xəzər Lənkəran”la son görüşdə isə qapını artıq Nəzirov qoruyurdu.
