25 avqust 2011 21:41
Əziz Yıldırım istefa verdi
Türkiyənin “Fenerbahçe” klubunun prezidenti Əziz Yıldırım bu gün yenidən diqqət mərkəzinə düşüb. Azerisport.az xəbər verir ki, ölkə futbolunda yaşanan xaosun ardından “Fenerbahçe”nin prezidenti gözlənilmədən Klublar Birliyinin rəhbəri postundan getdiyini açıqlayıb.
Hələ də həbsxanada saxlanılan “sarı-lacıvərdlilər”in prezidentinin bu addımının “Fenerbahçe”nin Çempionlar Liqasından kənarlaşdırılması ilə bağlı olduğu bildirilir. Qeyd edək ki, dünən Türkiyə Futbol Federasiyası, eləcə də UEFA onun başçılıq etdiyi klubu ÇL-dən kənarlaşdırmaqla yanaşı, “Trabzonspor”u onun əvəzində turnirə qaytardı.
Məhz bu üzdən bu gün “Fenerbahçe”nin baş məşqçisi Aykut Kocaman, eləcə də klub rəsmilərindən Nihat Özdemir istefa vermişdi. Lakin Əziz Yıldırım hələ ki, klub prezidentliyindən əl çəkmək istəmir. Onu Klublar Birliyində kimin əvəzləyəcəyi də açıq qalır.
