25 avqust 2011 00:38
Növbəti ŞOK: UEFA Feneri Trabzonsporla əvəzlədi
Türkiyənin “Fenerbahçe” klubunu UEFA Çempionlar Liqasında hansı klubun əvəzləyəcəyi müəyyənləşib. Azerisport.az xəbər verir ki, qitə futbol qurumu da artıq “Fenerbahçe”nin ən nüfuzlu klub turnirindən kənarlaşdırıldığını təsdiqləyib.
Bu komandanın əvəzində Türkiyəni ÇL-də “Trabzonspor” əvəzləyəcək. Hansı ki, son mövsümdə “Fenerbahçe” ilə eyni xal qazansa da, çempionluq “sarı-lacıvərdlilər”ə nəsib olmuşdu.
Xatırladaq ki, “Trabzonspor” da ÇL-də mübarizə aparırdı. Lakin pley-off mərhələsindən mübarizəyə başlayan bu komanda elə ilk cəhdindəcə Portuqaliyanın “Benfica” klubuna uduzmuşdu. Bu üzdən də trabzonlular UEFA Avropa Liqasının pley-off mərhələsində mübarizə aparmaq məcburiyyətində qalmışdı. Türkiyə təmsilçisinin rəqibi isə İspaniya “Athletic”i idi. Maraqlıdı ki, bu komandalar ötən həftə artıq ilk oyunlarına da çıxmışdılar. Lakin İspaniyada baş tutan görüşdə hesab açılmamışdı – 0:0.
Amma UEFA “Trabzonspor”u birbaşa ÇL-in qrup mərhələsində “daşıması” nəticəsində “Athletic”lə oyunlar da ləğv olunub. İndi də Trabzon klubunu həmin turnidə hansı klubun əvəzləyəcəyi açıq qalır.
