26 avqust 2011 01:57
UEFA Avropanın ən yaxşı futbolçusunun adını açıqladı
Avropada "ilin ən yaxşı futbolçusu"nun kimliyinə aydınlıq gəlib. Azerisport.az xəbər verir ki, Fransanın Monako şəhərində keçirilən Çempionlar Liqasının püşkatmasından sonra Avropada ilin ən yaxşı futbolçusunun adı açıqlanıb.
"Barcelona"nın argentinalı ulduzu Lionel Messi bütün rəqiblərini qabaqlayaraq fəxri mükafata sahib çıxıb. Bu mübarizədə komanda yoldaşı Xavi Ernandes və "Real"ın portuqaliyalı ulduzu Kriştiano Ronaldonu qabaqlayan Messi "ilin ən yaxşı futbolçusu" mükafatını birbaşa UEFA prezidenti Mişel Platininin əlindən alıb.
Messi mükafatı alıdıqdan sonra bu barədə fikirlərini bölüşüb: "Bu mükafatı qazandığım üçün çox xoşbəxtəm. Hər bir futbolçu kimi mən də həmişə yüksəlmək istəyirəm. Əsas məqsədim də elə budu. Komandada mehriban atmosferin olması bizə əlavə güc verir. Buna görə komanda yoldaşlarıma təşəkkür edirəm".
Avropada "ilin ən yaxşı futbolçusu" mükafatına namizədlərin ümumi siyahısı isə beləydi:
1. Lionel Messi (Barcelona)
2. Kriştiano Ronaldo (Real)
3. Xavi Ernandes (Barcelona)
4. Andres İnyesta (Barcelona)
5. Radamel Falkao (Porto)
6. Ueyn Runi (Manchester United)
7. Nemanya Vidiç (Manchester United)
8. Zlatan İbrahimoviç (Milan)
9. Cerard Pike (Barcelona)
10. Manuel Noyer (Bayern)
