27 avqust 2011 01:38
UEFA Superkuboku da Barcelonaya qismət oldu (YENİLƏNİB)
Bu gün Avropa Superkubokunun qalibi müəyyənləşib. Azerisport.az xəbər verir ki, həlledici oyunda UEFA Çempionlar Liqasının son qalibi “Barcelona” Avropa Liqasının baş mükafatına sahib çıxan “Porto” ilə münasibətlərinə aydınlıq gətirib.
Sayca 37-ci UEFA Superkubokunun qalibi Monakoda müəyyənləşib. “2 Luis” stadionunda baş tutan qarşılaşmanın maraqlı keçəcəyi öncədən də şübhə doğurmurdu. Qarşılaşmaya daha fəal başlayan ispanlar 39-cu dəqiqədə Messinin sayəsində hesabı açıblar. 86-cı dəqiqədə Rolando məhz Messiyə qarşı kobudluğa görə komandasını azlıqda qoyub. Bundan istifadə edən "Barsa" 2 dəqiqə sonra Fabreqasla daha bir qol vuraraq yekun nəticəni müəyyənləşdirib - 2:0. "Porto"da isə Quarin son saniyələrdə komandasının heyətində ikinci qırmızı vərəqə alan futbolçu olub.
Qeyd edək ki, UEFA Superkubokunu muzeyinə ən çox aparan klub İtaliyanın “Milan” klubudu. Düz 5 dəfə bu sevinci yaşayan “Milan” 1989-da “Barcelona”nı, 1990-da “Sampdoria”nı (İtaliya), 1994-də “Arsenal”ı (İngiltərə), 2003-də “Porto”nu (Portuqaliya), 2007-də isə “Sevilla”nı (İspaniya) keçərək kuboku başı üzərinə qaldırmışdı. 1973-cü ilin “Ajax” (Hollandiya), 1993-cü ilin “Parma” (İtaliya) ilə Superkubok mübarizəsi isə milanlılar üçün uğursuz alınıb.
Bütövlükdə isə, kuboku əvvəlki 36 il ərzində 11 ayrı ölkədən, 23 fərqli komanda qazana bilib. “Milan”dan sonra “Barcelona”, “Ajax” və “Liverpool” (İngiltərə) 3 dəfə eyni uğura sahib çıxan əsas liderlərdən idi. Lakin İspaniya klubu ötən gün “Milan”la aradakı kubok fərqini minimum endirə bildi. Artıq "Barsa" Superkubok qazanan komandaların sıralamasında ikinci sıradadı.
Bundan əlavə “Anderlecht” (Belçika), “Juventus” (İtaliya) və “Valencia” (İspaniya) 2 dəfə, “Aberdeen” (Şotlandiya), “Aston Villa” (İngiltərə), “Chelsea” (İngiltərə), “Dinamo” (Kiyev, Ukrayna), “Galatasaray” (Türkiyə), “Lazio” (İtaliya), “Manchester United” (İngiltərə), “Mechelen” (Belçika), “Nottingham Forest” (İngiltərə), “Parma” (İtaliya), “Porto” (Portuqaliya), “Real” (İspaniya) “Steaua” (Rumıniya), “Sevilla” (İspaniya), “Zenit” (Rusiya) və “Atletico” (İspaniya) da 1 dəfə Superkuboku muzeyinə apara bilib.
UEFA Superkuboku
26 avqust
Barcelona – Porto - 2:0 (1:0)
Qol: Messi, 39, Fabreqas, 88.
